Qozogʻiston AQShga «Lukoyl» ulushini sotib olish bo‘yicha xat yubordi

Qozog‘iston AQSh Moliya vazirligining Xorijiy aktivlarni nazorat qilish boshqarmasi (OFAC)ga «Lukoyl»ning mamlakatdagi ulushini sotib olish uchun ruxsat so‘rab rasmiy xat yubordi. Bu haqda Energetika vaziri Yerlan Akkenjenov ma’lum qildi.

Uning so‘zlariga ko‘ra, hukumat va Energetika vazirligi ilgari kompaniyaga ushbu aktivlarni sotib olish bo‘yicha murojaat qilmagan edi.

«Agar «Lukoyl»ning Qozog‘istondagi aktivlari sotilsa, biz ushbu ulushni qaytarib sotib olish bo‘yicha voris huquqimizdan foydalanishga egamiz. Energetika vazirligi OFAC’ga tegishli murojaat xatini yubordi», – dedi vazir.

Akkenjenov ulushni sotib olishning turli usullaridan foydalanish mumkinligini aytdi. Bitim bir martalik naqd pul to‘lovini talab qilmaydi: to‘lovni kechiktirish yoki xomashyo sotishdan tushgan mablag‘lardan foydalanish mumkin. Vazirlik Qozog‘istonda aktivlarni sotish paytida «Lukoyl» ulushini qonuniy va samarali sotib olishni ta’minlash uchun barcha variantlarni ko‘rib chiqmoqda.

O‘tgan yilning dekabr oyida Akkenjenov «Lukoyl» aktivlarini sotish muddati yanvar oyining o‘rtalariga qadar uzaytirilganini e’lon qilgandi va Energetika vazirligi jarayonni diqqat bilan kuzatib borayotganini va muddat tugaganidan keyin keyingi choralarni kutayotganini ta’kidlagandi.

Avvalroq Kursiv Uzbekistan Rossiyadagi neft narxlarining keskin pasayishi eng yirik xususiy neft kompaniyasi «Lukoyl»ni hukumatdan yordam so‘rashga majbur qilgani haqida yozgandi.