«Kripto bola» («Crypto Boy», 2023) zamonaviy moliyaviy dunyo, kriptovalyuta va avlodlar o‘rtasidagi ziddiyatlarni yorituvchi dramatik film.
Asar markazida yosh yigit Amir turadi. U texnologiya va tez boyish g‘oyalariga qattiq ishonadi, an’anaviy mehnat va barqaror hayot tarafdori bo‘lgan otasi bilan esa kelishmovchilikda yashaydi. Film ilk daqiqalardanoq orzular va haqiqat o‘rtasidagi murakkab chiziqni ko‘rsatadi.
Amir kripto bozoriga sho‘ng‘ib, qisqa vaqt ichida katta daromad topish mumkinligiga ishonadi. U ijtimoiy tarmoqlar, «muvaffaqiyatli treyderlar» va tez boyish haqidagi va’dalardan ilhomlanadi. Biroq bu yo‘l faqat pul emas, balki katta tavakkal, bosim va ma’naviy sinovlarni ham olib kelishini hali anglab yetmagan bo‘ladi.
Filmda ota va o‘g‘il o‘rtasidagi munosabatlar alohida o‘rin tutadi. Ota o‘z tajribasiga tayangan holda ehtiyotkorlikni tanlasa, Amir zamon bilan hamnafas bo‘lishni, eski qoidalardan voz kechishni xohlaydi.
«Crypto Boy» kriptovalyuta dunyosini faqat porloq tarafdan emas, balki uning qorong‘i jihatlari, firibgarlik, ishonchni suiiste’mol qilish va tez muvaffaqiyat ortidan keladigan ruhiy bosim orqali ochib beradi. Film yoshlar orasida ommalashgan «tez boyish» madaniyatini tanqidiy ko‘z bilan ko‘rsatadi.
Eslatib o‘tamiz, avvalroq Kursiv Uzbekistan «BlackBerry» filmi haqida ma’lumot bergandi.
