Saudiya Arabistonining eng qo‘rqinchli rollerkosteri uchta jahon rekordini o‘rnatdi — video

Yaqinda Saudiya Arabistonida ochilgan Six Flags Qiddiya City tematik bog‘i cho‘l hududining katta qismini keng ko‘lamli sayyohlik makoniga aylantirdi. Bu haqda Kursiv Media xabar berdi.

U dunyodagi eng uzun, eng baland va eng tezkor Amerika tepaliklari (rollerkosterlar) bilan maqtana oladi.

Six Flags Qiddiya City yirik Qiddiya loyihasining bir qismi bo‘lib, uning maqsadi Arabiston cho‘lining katta hududini dunyoning eng yirik ko‘ngilochar va turizm markazlaridan biriga aylantirishdir. Majmua mamlakat poytaxti Ar-Riyod yaqinida joylashgan. Kelgusida bu yerda kiber­spor­t arenasi, stadion va akvapark ham barpo etilishi rejalashtirilgan.

Six Flags Qiddiya City — Six Flags tarmog‘ining Shimoliy Amerikadan tashqarida qurilgan ilk tematik bog‘idir. Uning qurilishi qariyb to‘rt yil davom etdi. Majmua taxminan 32 gektar maydonni egallagan bo‘lib, unda restoranlar, savdo zonalari va, albatta, attraksionlar joylashgan.

Bog‘da jami 28 ta attraksion mavjud. Ularning uchtasi allaqachon rekordchi sifatida tarixga kirgan. Eng hayratlanarlisi — Falcon’s Flight. Bu bir vaqtning o‘zida dunyodagi eng baland, eng tez va eng uzun rollerkoster hisoblanadi. Ular soatiga 250 kilometr tezlikka chiqadi. Agar shundan keyin sayyohlarning oshqozonida nonushta qolgan bo‘lsa, ular yana bir xavfli tajribani — dunyodagi eng baland «qiya» roller­koster sifatida tan olingan Iron Rattler attraksionini sinab ko‘rishlari mumkin. Spitfire attraksioni esa eng baland inver­siya bo‘yicha rekordni ushlab turadi, ya’ni trekning poyezd to‘liq ag‘darilib, teskari holatda harakatlanadigan qismi eng baland hisoblanadi.

Six Flags Qiddiya City Saudiya Arabistonining nihoyatda ulkan va dadil loyihalar dasturi uchun ijobiy signal bo‘ldi. Bu, ayniqsa, dunyodagi eng yirik bino qurilishi vaqtincha to‘xtatilgan bir paytda muhim ahamiyat kasb etmoqda. Shu bilan birga, qirollikning boshqa hududlarida dunyodagi eng baland bino unvoniga da’vogarlik qiluvchi inshoot jadal sur’atlarda barpo etilmoqda.

Six Flags Qiddiya City’ga qanday borish mumkin

Ko‘ngilochar bog‘ Ar-Riyod markazidan taxminan 60 km uzoqlikda, bir soatdan ko‘proq masofada joylashgan. Bog‘ga kirish uchun faqat to‘lov qilish kerak. Kattalar uchun standart chipta 275 Saudiya riali (taxminan 900 ming so‘m) turadi, bolalar uchun chegirmalar va oilaviy paket ham mavjud. Six Flags Qiddiya City shuningdek, App Store va Google Play’da ish vaqti va xaritasi ko‘rsatilgan o‘z ilovasiga ega.

Hozirda Toshkentdan Ar-Riyodga to‘g‘ridan to‘g‘ri reyslar yo‘q. U yerga borish uchun yo‘lovchilar ko‘pincha Dubay yoki Boku orqali uchishadi.

Avvalroq «Kursiv» Toshkent parklarida 39 ta attraksion ruxsatsiz ishlayotgani haqida yozgandi.