Ispaniya kubogi yarim finalining dastlabki bahsida «Atletiko Madrid» o‘z maydonida «Barselona» ustidan 4:0 hisobida ishonchli g‘alaba qozondi. Uchrashuv taqdiri birinchi bo‘limdayoq hal etildi.
O‘yin kataloniyaliklar uchun omadsiz boshlandi. 6-daqiqada Erik Garsiya o‘z darvozasini ishg‘ol qilib qo‘ydi. Shundan so‘ng mezbonlar hujumkorlikni oshirdi va Antuan Grizman (14-daqiqa), Ademola Lukman (33-daqiqa) hamda Xulian Alvaresning (45+2-daqiqa) gollari evaziga tanaffusga yirik hisob bilan chiqib ketishdi.
Ikkinchi bo‘limda «Barselona» hisobni qisqartirishga urindi, biroq Pau Kubarsining goli ofsayd sababli inobatga olinmadi. O‘yin yakunida, 85-daqiqada Erik Garsiya Aleks Baenaga nisbatan qo‘pollik ishlatgani uchun maydondan chetlatildi.
Diyego Simeone shogirdlari final sari dadil qadam tashlashdi. Javob uchrashuvi 3-mart kuni bo‘lib o‘tadi, ammo 10 karra chempion hisoblangan «Barselona» oldida murakkab vazifa turibdi.
Avvalroq Kursiv Uzbekistan «Barselona» «Real»ni mag‘lub etib, Ispaniya kubogini qo‘lga kiritgani haqida xabar bergan edi.
