Boks olamining ikki buyuk vakili Mayk Tayson va Floyd Mayvezer o‘rtasidagi ko‘rgazmali jang 2026-yilning 25-aprel kuni Kongo Demokratik Respublikasida bo‘lib o‘tishi belgilandi. Bu haqda Daily Mail nashri xabar bermoqda.
Tashkilotchilar dastlab jangni mart oyiga rejalashtirgan edilar, biroq yakunda tanlov 25-aprel sanasi va Markaziy Afrikadagi Kongo davlatida to‘xtaldi. Ushbu hudud 1974-yili Muhammad Ali va Jorj Forman o‘rtasidagi mashhur Rumble in the Jungle jangiga mezbonlik qilgan bo‘lib, boks tarixidagi eng nufuzli manzillardan biri hisoblanadi.
Mayk Taysonning iyun oyida 60 yoshni qarshilashi va uning 2024-yili bloger Jeyk Polga qarshi kechgan jangdagi sust harakatlari jamoatchilikda uning salomatligi borasida xavotirlar uyg‘otmoqda. Floyd Mayvezer esa kelasi hafta 49 yoshga to‘lishiga qaramay, o‘zining 50-0 ko‘rsatkichli professional rekordini saqlab qolgan va yuqori jismoniy holatda ekanini namoyish etib kelmoqda.
Ma’lumot uchun, Taysonning Jeyk Pol bilan o‘tkazgan oxirgi jangi Netflix platformasida 108 mln kishi tomonidan tomosha qilingan edi. Mutaxassislarning taxminicha, ikki afsonaning o‘zaro to‘qnashuvi ushbu ko‘rsatkichdan ham yuqori natija qayd etishi mumkin.
Avvalroq Kursiv Uzbekistan Mayk Tayson va Floyd Mayvezer 2026-yilda ringga chiqishi haqida xabar bergan edi.
