Toshkent shahrida yana bir narkolaboratoriya fosh qilindi

Toshkent shahrida narkotik moddalar tayyorlanadigan laboratoriya fosh qilinib, katta miqdorda giyohvandlik vositalari musodara etildi. Bu haqda DXX ma’lum qildi.

Yuqori Chirchiq tumanida harakatlanayotgan «Spark» avtomashinasida 1993, 1994 va 1995-yillarda tug‘ilgan 3 nafar shaxsdan 37 dona «Tropikamid» va 124 dona pregabalin kapsulalari topildi.

Shuningdek, Toshkent shahrida yashovchi, 1998-yilda tug‘ilgan 2 nafar shaxs «zakladka» tarzida qo‘ygan 1 186 dona «Pregabalin» va 125 dona «Tropikamid» olib qo‘yilgan. Ular dorilarni Sergeli tumanidagi narkolaboratoriyadan olgan.

Laboratoriyada 4 nafar shaxs dorilar tayyorlayotgani aniqlanib, uy va laboratoriyadan 5 130 dona «Pregabalin» kapsulalari, 10 kg «Pregabalin», 75 dona flakonda «Tropikamid» va 6 kg «Tropikamid» moddalari, shuningdek, 60 ming dona bo‘sh kapsula va flakonlar musodara qilindi.

Bundan tashqari, 1987-yilda tug‘ilgan shaxsning Shayxontohur tumanidagi uyi va avtomashinasidan 16 227 dona «Pregabalin», 7 947 dona «Regapen», 35 dona «Lirica» va 14 dona «Perge» jami 24 223 dona kuchli ta’sir qiluvchi dorilar musodara qilindi.

Hozirda barcha holatlar bo‘yicha Jinoyat kodeksining 251¹-moddasi bilan jinoiy ish qo‘zg‘atilgan va gumonlanuvchilarga «qamoq» ehtiyot chorasi qo‘llangan. Farg‘ona viloyatidagi jinoiy sheriklarni aniqlash ishlari davom etmoqda.

Eslatib o‘tamiz, avvalroq Toshkentda ijara uyini narkolaboratoriya qilgan talabalar va 9 «zakladchik» ushlangan edi.