Ko‘pchilik yangi avtomobillarda USB-A va USB-C portlar mavjud, ularni markaziy konsolda, boshqaruv panelida yoki hatto orqa o‘rindiqlar yonida ko‘rish mumkin. Ko‘pchilik haydovchilar buni qulaylik deb hisoblab, telefonlarini shu portlar orqali zaryadlashadi. Lekin afsuski, bu portlar telefonni tez va samarali zaryadlashga mo‘ljallanmagan.
Masalan, Chevrolet Blazer 2024 modelida USB-C portlari mavjud, ammo ular faqat ma’lumot uzatish va infotainment tizimlariga ulanish uchun mo‘ljallangan. Misol uchun, foydalanuvchilar o‘z Samsung Galaxy S25+ telefonini portga ulaganda, batareya faqat 3 – 5% zaryadlanganini ko‘rgan. Sababi shuki, ko‘pgina avtomobil USB-portlari atigi 0,5-1A tok beradi, bu esa smartfonning katta batareyasini to‘liq yoki tez zaryadlashga yetmaydi.
USB-portlar asosan CarPlay, Android Auto, qo‘lda qo‘ng‘iroqlar va musiqa ijrosi uchun ishlatiladi. Shuning uchun portdan foydalanganingizda, telefon zaryadi faqat asta-sekin oshadi, hatto navigatsiya va ilovalar ishlatilsa, zaryad kamayib ham ketishi mumkin.
Bundan tashqari, ko‘pgina avtomobillarda har doim ishlaydigan ikkinchi USB-portlar mavjud, ular 2.1A tok berishi mumkin. Lekin bu ham ko‘p hollarda yetarli emas, chunki ko‘p smartfonlar tez zaryadlash uchun 3A va undan yuqori tokni talab qiladi. Masalan, Samsung Galaxy S25 25 – 45W tez zaryadlashni qo‘llab-quvvatlaydi, iPhone 17 esa 40W gacha zaryad oladi. Avtomobil portlarining quvvati esa bunga yetmaydi.
Telefonni avtomobilda tez va samarali zaryadlashning to‘g‘ri yo‘li
Eng yaxshi yechim – 12V quvvat chiqaradigan avtomobil soketi. Ushbu portlar odatda 10 – 20A tok beradi, ya’ni 120 – 240W quvvat taqdim etadi. Shu bilan siz telefon, planshet, hatto noutbuklarni ham uydagi tezlikda zaryad qilishingiz mumkin.
Masalan, UGREEN 130W 3-port avtomobil zaryadlovchisi barcha uch porti bilan telefonlarni tez zaryadlaydi. USB-A port 22,5W quvvat beradi, pastki USB-C port esa 100W tez zaryadlashni qo‘llab-quvvatlaydi. Shu bilan telefoningiz batareyasi tez to‘lib, avtomobildagi navigatsiya yoki boshqa ilovalar bilan ishlash davom etadi.
Avtomobil USB-portlari ko‘proq ma’lumot uzatish va infotainment tizimi bilan ishlash uchun mo‘ljallangan, telefonlarni tez zaryadlash uchun emas. Telefon, planshet va boshqa gadjetlarni tez va samarali zaryadlash uchun alohida 12V avtomobil zaryadlovchi yoki yuqori quvvatli USB-C adapter ishlatish tavsiya etiladi.
Avvalroq Kursiv Uzbekistan Chevrolet avtomobillari uchun disklarni qanday tanlash kerakligi haqida yozgandi.
