Yangilangan Xpeng X9 avtomobili taqdim etildi

Xitoyda yangilangan Xpeng X9 elektrominiveni savdoga chiqdi. Bu haqda CarNewsChina nashri xabar bermoqda.

2026-yilgi model narxi 309 800 yuandan 369 800 yuangacha, ya’ni taxminan $45 170 – $53 920 oralig‘ida etib belgilandi. Model asosiy yangiliklari sifatida orqa g‘ildiraklarni burish tizimi, 2 250 TOPS hisoblash quvvati va 800V yuqori kuchlanishli platforma bilan taklif qilinmoqda.

Xpeng X9 yirik MPV segmentiga kiradi. Uning o‘lchamlari 5 316 mm uzunlik, 1 988 mm kenglik va 1 785 mm balandlikni tashkil etadi. Model avvalgisiga nisbatan 23 mm uzunroq bo‘lgan, biroq 3 160 mm g‘ildirak bazasi o‘zgarmagan.

Uzatmalar selektori rul ustuniga o‘rnatilgan. Salon yetti o‘rinli 2+2+3 sxemasida taklif etiladi. Ikkinchi qatordagi kapitan kreslolari «nol tortishish» rejimini qo‘llab-quvvatlaydi. Tom qismida 21,4 dyuymli ekran o‘rnatilgan. Yangi AIOS 6.0 tizimi sun’iy intellekt asosida zaryad tavsiyalari va ovozli boshqaruvni ta’minlaydi.

Texnologik jihatdan model uchta Turing AI chipi bilan jihozlangan. Ularning umumiy hisoblash quvvati 2 250 TOPSga yetadi. Avtomobil yangilangan ikkinchi avlod VLA tizimi orqali avtomatik parkovka va hatto qishloq yo‘llarida ham NOA rejimida yarim avtonom harakatlana oladi. Tizim 130 km/soat tezlikda favqulodda burilish yordamidan ham foydalanadi.

Bazaviy versiya old o‘qda 235 kW yoki 315 ot kuchiga teng bitta elektromotor bilan jihozlangan. To‘liq uzatmali 4WD varianti 370 kW yoki 496 ot kuchi ishlab chiqaradi. Ikki turdagi batareya taklif etiladi: 94,8 kWh LFP va 110 kWh NMC. CLTC sikli bo‘yicha yurish zaxirasi 650 – 750 kmni tashkil qiladi.

Bundan tashqari, Xpeng X9 EREV modelining yangi Ultra SE versiyasi ham taqdim etildi. U orqa o‘qqa o‘rnatilgan 210 kW quvvatli elektromotor va 63,3 kWh LFP batareya bilan jihozlangan.

Eslatib o‘tamiz, Kursiv Uzbekistan nashri Xpeng Motors 2026-yilgi X9 elektromobilini 2-mart kuni taqdim etishi haqida yozgan edi.