Telegram shaxsiy chatni skrinshot qilishni taqiqlash funksiyasini ishga tushirdi

Telegram messenjeri 12.5 versiyasigacha yangilandi. Yilning ilk bahorgi yangilanishida Premium obunachilar ham, bepul foydalanuvchilar ham uchun qator yangi funksiyalar taqdim etildi.

Premium uchun: shaxsiy chatlarda nusxa olishni taqiqlash

Endi Telegram Premium obunachilari istalgan shaxsiy chatdagi yozishmalarni himoya qila oladi. Agar funksiya yoqilsa, suhbatdosh xabarlarni boshqa chatga yubora olmaydi, matndan nusxa ko‘chira olmaydi, skrinshot qilishi cheklanadi hamda mediafayllarni saqlay olmaydi. Funksiyani yoqish uchun foydalanuvchi profiliga kirib, menyu orqali «Nusxa olishni taqiqlash» bandini tanlash kerak. Hozircha bu imkoniyat faqat Premium foydalanuvchilar uchun mavjud.

Guruhlarda ishtirokchilar uchun teglar

Guruh chatlarida endi ism yoniga maxsus teg qo‘shish mumkin. Bu teg orqali foydalanuvchi o‘z lavozimini, jamoaviy rolini yoki qiziqishlarini ko‘rsatishi mumkin. Administratorlar sozlamalar orqali ishtirokchilarga o‘z tegini mustaqil o‘zgartirish huquqini berishi yoki cheklashi mumkin.

GIF’larga imzo qo‘shish

Endi GIF yuborishda unga matnli izoh qo‘shish mumkin. Imzoni animatsiya ustiga yoki pastiga joylashtirish imkoni mavjud bo‘lib, bu funksional xabarlarni yanada tushunarli va ifodali qilishga yordam beradi.

Suratdan tezkor stiker yaratish

Oddiy fotosuratni bir bosish bilan stikerga aylantirish mumkin. Yuborishdan oldin rasmni tahrirlash, obyektni kesib olish, matn yoki emoji qo‘shish imkoniyati mavjud. Bu esa shaxsiy stikerlar yaratishni ancha osonlashtiradi.

GIF va stikerlarni tahrirlash

GIF va stikerlarni Telegram’ning ichki foto-tahrirlagichi orqali o‘zgartirish mumkin. Foydalanuvchilar ularga matn qo‘shishi, chizishi, emoji joylashtirishi yoki GIF’ni qisqartirishi mumkin. Natijada kontent bilan ishlash yanada qulaylashdi.

Telegram orqali avtorizatsiya

Endi sayt va ilovalarga Telegram akkaunti orqali tez ro‘yxatdan o‘tish yoki kirish mumkin. Bunda alohida parol yaratish talab qilinmaydi. Foydalanuvchi telefon raqamini ulashishi yoki servisga Telegram orqali xabar yuborish huquqini berishi mumkin. Bu esa avtorizatsiya jarayonini sezilarli darajada soddalashtiradi.

Boshqa yangiliklar

So‘rovnomalarda endi ovoz berish vaqti ko‘rinadigan bo‘ldi. Botlar javobni bosqichma-bosqich chiqarishi mumkin.

Shuningdek, xabarlarda yangi «Sana» formatlash opsiyasi paydo bo‘ldi – belgilangan sana ustiga bosilganda uni kalendarga qo‘shish yoki eslatma o‘rnatish mumkin.

Avvalroq Kursiv Uzbekistan Rossiyada Telegram’ni bloklash muddati aprel boshiga rejalashtirilayotgani haqida yozgandi.