Rikor kompaniyasi Neuro S3 va Neuro S5 smartfonlarini taqdim etdi

Rossiyaning Rikor kompaniyasi Neuro S seriyasidagi ikkita yangi smartfon modelini savdoga chiqardi. Yangi qurilmalarning dastlabki partiyasi Xitoyda yig‘ilgan.

Ikkala yangi model ham vizual jihatdan farq qilmaydi, Android 15 operatsion tizimida ishlaydi va 8 yadroli Unisoc Tiger T8200 protsessori bilan jihozlangan. Qurilmalar 120 Hz yangilanish chastotasiga ega ekran, 6000 mA/soat sig‘imli akkumulyator, shuningdek, eSIM qo‘llab-quvvatlashi va maxsus dasturlashtiriladigan tugmani o‘z ichiga oladi.

Neuro S3 modelining narxi 19 ming rubl (2,9 mln so‘m)ni tashkil qiladi. U HD+ ruxsatli displey, 6 GB tezkor va 128 GB ichki xotiraga ega. Kameralar tizimi OmniVision kompaniyasining 64 megapikselli asosiy sensori, 8 megapikselli keng burchakli va 5 megapikselli makro obyektiv, shuningdek, Sony tomonidan ishlab chiqarilgan 8 megapikselli old kamerani o‘z ichiga oladi. Qurilmaning quvvatlanish tezligi 18 Vt qilib belgilangan.

Neuro S5 modeli 22 ming rubl (3,4 mln so‘m)ga baholangan bo‘lib, asosan apparat ta’minotidagi afzalliklari bilan ajralib turadi. U Full HD+ ekran, 8 GB tezkor va 256 GB ichki xotirani taklif etadi. Uning 64 megapikselli asosiy kamerasi Samsung sensoriga asoslangan, old kamerasi ruxsati esa 16 megapikselgacha oshirilgan hamda 33 Vt tezkor quvvatlanishni qo‘llab-quvvatlaydi.

Avvalroq Kursiv Uzbekistan Google Pixel smartfon va soatlari yangilanish olgani haqida xabar bergan edi.