Havodan quvvat oluvchi sun’iy yoʻldosh sinovdan oʻtdi

Oʻta past Yer orbitasida sun’iy yoʻldoshlar uchun an’anaviy yoqilgʻi oʻrniga atmosfera zarralaridan foydalanuvchi yangi elektr harakatlanish (ABEP) tizimi loyihasi muvaffaqiyatli sinovdan oʻtdi. Ushbu texnologiya qurilmalarning ishlash muddatini uzaytirish va parvoz xarajatlarini kamaytirish imkonini beradi.

Yangi texnologiya sun’iy yoʻldoshlarga 180 dan 250 kilometrgacha boʻlgan oʻta past Yer orbitasida barqaror ishlash imkonini beradi. Dvigatel atmosferada qolgan gazlarni yigʻib, ularni ionlashtiradi va tortishish kuchi hosil qilish uchun tezlashtiradi.

Cathodeless Electric Propulsion Thruster deb nomlangan loyiha TransMIT GmbH kompaniyasi tomonidan amalga oshirilmoqda. IQM kompaniyasi esa Yevropa kosmik agentligi granti asosida katodsiz dvigatel prototipini yaratishga rahbarlik qilyapti.

Tizim azot va kislorod aralashmalarida barqaror ishlashi, kamida 50 foiz elektr samaradorligiga va 4,2 ming soniya solishtirma impulsga erishishi koʻzda tutilgan. Bortda yoqilgʻi olib yurish zaruratining yoʻqolishi sunʼiy yoʻldoshlarning ogʻirligini kamaytirib, ularning koinotdagi rolini muhim darajada oʻzgartirishi kutilmoqda.

Avvalroq Kursiv Uzbekistan Apple sun’iy yo‘ldosh orqali aloqani kuchaytiruvchi g‘ilof ustida ishlayotgani haqida xabar bergan edi.