Xitoyning Chery kompaniyasi yangi Chery QQ3 EV elektromobilini rasman taqdim etdi. Bu haqda CarNewsChina nashri xabar bermoqda.
Ushbu model ishga tushirilgach qisqa vaqt ichida 56,8 mingta buyurtma to‘pladi. Qurilma 58,9 ming–78 ming yuan ($8,2 ming–$11,2 ming) narxda taklif etilmoqda va arzon elektromobillar segmentida jiddiy raqobatchi sifatida baholanmoqda.
Yangi model yumaloq va ixcham dizayni bilan ajralib turadi. Old qismida yopiq radiator panjarasi va Q shaklidagi LED faralar qo‘llangan. Avtomobil uzunligi 4195 mm bo‘lib, turli rang variantlari bilan taklif etiladi.
Salonida zamonaviy multimedia tizimi o‘rnatilgan. Yuqori komplektatsiyalarda 15,6 dyuymli ekran va 8,8 dyuymli panel mavjud. Tizim Qualcomm Snapdragon 8155 chipida ishlaydi va Apple CarPlay hamda Huawei HiCar’ni qo‘llab-quvvatlaydi. Ichkarida isitiladigan va shamollatiladigan o‘rindiqlar, Bluetooth kalit va ko‘plab saqlash joylari mavjud.
Texnik jihatdan model orqa g‘ildirakdan tortuvchi tizimga ega. U ikki xil quvvat variantida taklif etiladi. Batareya sig‘imi 29,48 kWh va 41,28 kWh bo‘lib, mos ravishda 310 km va 420 km yurish imkonini beradi. Tezkor zaryadlash orqali batareyani 30 foizdan 80 foizgacha 16,5 daqiqada to‘ldirish mumkin.
Chery QQ3 EV arzon narxi, yaxshi yurish zaxirasi va zamonaviy funksiyalari bilan bozorga kirib keldi. Model kichik elektromobillar segmentida talabni oshirishi kutilmoqda.
Eslatib o‘tamiz, Kursiv Uzbekistan nashri Chery Fulwin T9L avtomobilining oldindan savdosi boshlangani haqida yozgan edi.
