AQShning Florida shtatida Artemis II missiyasi uchishiga hisoblash jarayoni boshlandi. Bu o‘n yilliklar ichidagi Oy atrofida ekipaj bilan uchadigan birinchi parvoz bo‘ladi, deya xabar berdi NASA.
Hisoblash AQSh sharqiy vaqtiga ko‘ra kunduzgi soatlarda boshlandi va 1-aprel kuni kechqurun raketa uchishi bilan yakunlanadi. Ushbu parvoz yangi avlod Space Launch System raketasi va Orion kosmik kemasida ekipajni Oyga jo‘natadigan ilk safar bo‘ladi.
Maydonda keng qamrovli texnik ishlar boshlandi. Muhandislar aloqa va boshqaruv tizimlarini sinovdan o‘tkazmoqda, bort uskuna tizimlarini ishga tushirmoqda va raketani sovitilgan yoqilg‘i komponentlari — suyuq vodorod va kislorod bilan to‘ldirilmoqda. Shu bilan birga, mutaxassislar suv bilan ovozni bostirish tizimini ham to‘ldiradi, bu raketa ishga tushirilganda dvigatellarning kuchli shovqinini kamaytiradi.
Missiya ekipaji to‘rt astronavtdan iborat: NASA vakillari Reid Wiseman, Victor Glover va Christina Koch hamda Kanada astronavti Jeremy Hansen. Ular uchishdan oldin izolyatsiyada bo‘lib, tibbiy tekshiruvdan o‘tadi va uskuna hamda ob-havo holati bo‘yicha so‘nggi ma’lumotlarni oladi.
Meteorologlarning baholashicha, uchish vaqtidagi ob-havo sharoitlari ijobiy bo‘lish ehtimoli taxminan 80 foizni tashkil qiladi. Asosiy xavf omillari – hududdagi shamol tezligining oshishi va bulutli iqlim.
Eslatib o‘tamiz, avvalroq NASA kompaniyasining Perseverance rover apparati Marsdagi Jezero krateri hududida nikelning rekord darajadagi miqdorini aniqlagan edi.
