Toshkentda fuqaro sud qaroridan noroziligini noodatiy yo‘l bilan bildirdi

Toshkentda fuqaro sud qaroridan noroziligini g‘ayrioddiy usulda bildirdi. Bu haqda Oliy sud matbuot kotibi Aziz Abidov Telegram’dagi kanalida ma’lum qildi.

Unga ko‘ra, 1979-yilda Toshkent viloyatida tug‘ilgan fuqaro o‘ziga oid jinoyat ishi bo‘yicha sud qarorlaridan norozi ekanini bildirib, daraxtga chiqqan. U pastga tushirilib, tibbiy ko‘rikdan o‘tkazilganda fuqaroga hech qanday jarohat yetmagani aniqlangan.

Shundan so‘ng u Oliy sud raisi Baxtiyor Islomov tomonidan qabul qilindi. Uning murojaati belgilangan tartibda ko‘rib chiqish uchun rasmiylashtirilgan. Ma’lum qilinishicha, fuqaro avval ham sudlangan. Chilonzor tumani sudining 2020-yil 5-oktabrdagi hukmiga ko‘ra, u Jinoyat kodeksining 167-moddasi 3-qismi «a» bandi bilan 7 yilga ozodlikdan mahrum etilgan. Shu bilan birga, u Jinoyat kodeksining 184-moddasi bo‘yicha ayblovdan oqlangan.

Birinchi instansiya sudi chiqargan hukm yuqori sud instansiyalarida ko‘rib chiqilib, o‘zgarishsiz qoldirilgan. 2025-yil 29-noyabr kuni ham fuqaro Oliy sud raisi qabulida bo‘lgan. O‘shanda unga sud qarorlarini o‘zgartirish uchun yetarli asos yo‘qligi ma’lum qilingan.

Eslatib o‘tamiz, Kursiv Uzbekistan $10 ming evaziga sud hukmini o‘zgartirmoqchi bo‘lgan advokat ushlangani haqida yozgan edi.