O‘zbekiston Ruanda bilan diplomatik aloqalar o‘rnatdi

O‘zbekiston Ruanda davlati bilan rasmiy diplomatik munosabatlarni yo‘lga qo‘ydi. Bu haqda Tashqi ishlat vaziri Baxtiyor Saidov ma’lum qildi.

Vazirning ma’lum qilishicha, Ruanda bilan diplomatik aloqalar o‘rnatish to‘g‘risidagi Qo‘shma kommyunike imzolandi. Hujjat Olivye Nduhungirehe bilan birgalikda imzolangan.

Shuningdek, ikki davlat tashqi ishlar vazirliklari o‘rtasida siyosiy maslahatlashuvlar mexanizmini yo‘lga qo‘yish bo‘yicha Anglashuv memorandumi ham qabul qilindi. Uchrashuv Antaliya diplomatik forumi doirasida bo‘lib o‘tdi.

Qayd etilishicha, Ruanda O‘zbekiston bilan diplomatik aloqalar o‘rnatgan 167-davlatga aylandi. Vazir Baxtiyor Saidov bu jarayonni O‘zbekistonning Afrika davlatlari bilan hamkorligini kengaytirish yo‘lidagi muhim qadam sifatida baholadi.

Ma’lumot uchun, Ruanda so‘nggi yillarda xalqaro maydonda faol tashqi siyosat yuritayotgan davlatlardan biri sifatida tilga olinmoqda. Ushbu hamkorlik ikki tomonlama siyosiy muloqot va kelgusida iqtisodiy aloqalarni rivojlantirish uchun yangi imkoniyatlar yaratishi kutilmoqda.

Eslatib o‘tamiz, avvalroq O‘zbekiston Lesoto bilan diplomatik munosabatlar o‘rnatgan edi.