“Humo” xokkey klubi homiy izlamoqda: klub Qozogʻiston ligasiga qaytishi mumkin

Toshkentning «Humo» xokkey klubi yangi moliyaviy hamkorlarni izlamoqda. Variantlar orasida mahalliy va xorijiy, jumladan, Rossiya kompaniyalari ham koʻrib chiqilmoqda. Bu haqda Oʻzbekiston xokkey federatsiyasi vitse-prezidenti Bahodir Gʻofurov maʼlum qildi.

Uning aytishicha, klub hozirda «langar» homiy topishga harakat qilmoqda. Bir vaqtning oʻzida bir nechta investor jalb etilishi ham istisno qilinmadi. Shu bilan birga, potensial hamkorlar sanksiyalar roʻyxatida boʻlmasligi muhim shartlardan biri sifatida koʻrilmoqda.

Klub ayni paytda Oʻzbekiston chempionatida ishtirok etmoqda. Oʻtgan mavsumda esa jamoa Qozogʻistonning Pro Hokei Ligasy turnirida qatnashib, yarim finalgacha yetib borgan edi. Federatsiya vakili klubning ushbu ligaga qaytish ehtimoli borligini aytdi. Bunday ssenariyda ikki mamlakat bozoriga qiziqish bildirgan kompaniyalar asosiy homiy boʻlishi mumkin.

Gʻofurovga koʻra, klub oldida yana bir muammo bor, yaʼni tayyorgarlikni kech boshlash odati saqlanib qolmoqda. Avvalgi yillarda «Humo» Butunrossiya xokkey ligasiga (BXL) va Qozogʻiston ligasiga oxirgi pallada qoʻshilgan. Bu safar esa jamoa moliyalashtirish masalasini erta hal qilib, mavsumga tayyorgarlikni kamida may oyidan boshlashni rejalashtirmoqda.

Shu bilan birga, Gʻofurov BXLga qaytish varianti hozircha koʻrib chiqilmayotganini qoʻshimcha qildi. U bunga asosiy sabab sifatida yuqori xarajatlarni keltirdi. Qozogʻiston chempionati esa moliyaviy jihatdan maqbulroq boʻlib, u yerda oʻynash terma jamoa uchun futbolchilarni shakllantirish va oʻyin amaliyotini saqlab turishga xizmat qiladi.

Ochiq manbalarga koʻra, klub Baxtiyor Fozilovga tegishli ekanligi aytiladigan Enter Engineering va Eriell kompaniyalari bilan hamkorlik qilgan. Shuningdek, Fozilov 2018-yida tashkil etilgan O‘zbekiston xokkey federatsiyasi prezidenti lavozimini egallab kelmoqda. 

2025-yil may oyida klub xokkeychilari Shavkat Mirziyoyevga jamoaviy murojaat yoʻllab, ish haqi bir necha oy davomida kechiktirilayotganidan shikoyat qilgan va qarzdorliklarni bartaraf etishni soʻragan edi.

Avvalroq Kursiv Uzbekistan Xokkey klublar uchun foyda soligʻi uch yil muddatga 50 foizga kamaytirilgani haqida xabar bergan edi