Shavkat Mirziyoyev Raxmatulla Jabbarovni faxriy unvon bilan taqdirladi

Shavkat Mirziyoyev tomonidan qabul qilingan farmonga muvofiq, Jabbarov Raxmatulla Mamatovichga «O‘zbekiston Respublikasida xizmat ko‘rsatgan yoshlar murabbiysi» faxriy unvoni topshirildi. Bu haqda prezident matbuot xizmati xabar berdi.

Mazkur mukofot Jabbarovning ko‘p yillik samarali mehnati, jamiyat hayotidagi faol ishtiroki hamda yoshlarni tarbiyalashdagi xizmatlari e’tirofi sifatida berildi.

Farmonda ta’kidlanishicha, Raxmatulla Mamatovich millatlararo do‘stlik va hamjihatlikni mustahkamlash, turli millat hamda elatlar o‘rtasida o‘zaro hurmat va bag‘rikenglikni targ‘ib etish yo‘lida faol ish olib borgan. Shuningdek, u milliy madaniyatlar, urf-odat va an’analarni rivojlantirishga ham munosib hissa qo‘shgan.

Uning yosh avlodni Vatanga muhabbat, sadoqat va umuminsoniy qadriyatlarga hurmat ruhida tarbiyalash borasidagi ishlari ham alohida qayd etildi. Mukofot uning tavalludining 75 yilligi munosabati bilan ham taqdim qilindi.

Avvalroq «Kursiv» nashri Xayriddin Sultonovga «O‘zbekiston xalq yozuvchisi» unvoni berilgani haqida yozgandi.