Angliya premyer-ligasining 37-turida «Arsenal» Emirates stadionida «Byornli» bilan kuch sinashdi va raqibini 1:0 hisobida mag‘lubiyatga uchratdi.
Uchrashuvda «Arsenal» bosh murabbiyi Mikel Arteta hujumkor tarkibni maydonga tushirdi. O‘yinning borishi to‘liq londonliklar nazoratida bo‘ldi, garchi «Byornli» darvozasiga ikkinchi gol kiritilmagan bo‘lsa ham. Birinchi bo‘limda Leandro Trossardning zarbasi darvoza ustuniga tegdi.
O‘yindagi yagona golga 37-daqiqada Kay Xaverts mualliflik qildi. Xaverts o‘yin davomida nafaqat gol urdi, balki raqib futbolchisi Lesli Ugochukvuga nisbatan qo‘pol harakati uchun qizil kartochkadan qutulib qoldi. VAR tizimi ushbu vaziyatda hakamning faqat sariq kartochka ko‘rsatganini to‘g‘ri deb topdi.
Mazkur g‘alaba evaziga «Arsenal» 22 yildan so‘ng ilk bor APL chempionligini qo‘lga kiritishga juda yaqin turibdi. Jamoa ayni paytda eng yaqin ta’qibchisi «Manchester Siti»dan besh ochkoga oldinda bormoqda, biroq Pep Gvardiola shogirdlari zaxirasida yana bitta o‘yin bor. Agar «Siti» «Bornmut» bilan o‘yinda ochko yo‘qotsa, londonliklar muddatidan avval chempion bo‘lishadi.
Jamoani APLdagi so‘nggi tur o‘yinidan tashqari 30-may kuni Budapeshtda PSJga qarshi Chempionlar ligasi finali ham kutib turibdi. O‘z navbatida, autsayderlar qatorida borayotgan «Byornli» jamoasi Chempionshipga tushib ketishi aniq bo‘lgan. Jamoa so‘nggi 27 ta turda atigi bitta g‘alabaga erishgan.
Avvalroq Kursiv Uzbekistan «Arsenal» YChL yarim finalida «Atletiko»ni minimal hisobda mag‘lub etgani haqida xabar bergan edi.
