iOS 27 tizimidagi Siri foydalanuvchilar o‘rniga matn yozadi

iOS 27 va iPadOS 27 versiyalarida Siri kundalik vazifalarga yanada ko‘proq integratsiya qilinib, foydalanuvchi o‘rniga matn yozish va sun’iy intellekt orqali fon rasmlarini yaratish imkoniyatlariga ega bo‘ladi. Bu haqda Bloomberg ma’lum qildi.

Bloomberg jurnalisti Mark Gurman iOS 27 hamda iPadOS 27 operatsion tizimlariga qo‘shilishi kutilayotgan yangi sun’iy intellekt (SI) funksiyalari haqida ma’lumot berdi. Siri foydalanuvchi yozgan matndagi grammatik xatolarni aniqlab, darhol to‘g‘ri variantlarni taklif qilishni o‘rganadi.

Gurman bu funksiyani Grammarly ilovasining ishlashiga o‘xshatmoqda. Unga ko‘ra, tahrirlar yarim shaffof ochiluvchi menyuda ko‘rinadi. Foydalanuvchilar o‘z matnini Siri taklif qilgan variant bilan solishtirib, o‘zgarishlarni qisman yoki to‘liq qabul qilishi yoxud umuman e’tiborsiz qoldirishi mumkin bo‘ladi.

Shuningdek, Siri foydalanuvchi o‘rniga matn yozishni o‘zlashtirmoqda. «Siri bilan yozing» deb nomlangan ushbu funksiyadan klaviatura faol bo‘lgan har qanday vaqtda foydalanish mumkin bo‘lishi rejalashtirilgan.

Bundan tashqari, Apple bir qator odatiy amallarni avtomatlashtirish uchun mo‘ljallangan «Buyruqlar» (Shortcuts) funksiyasini tubdan qayta ishlamoqda. Yangilanish natijasida foydalanuvchilar so‘rovlarni qo‘lda yaratish o‘rniga, Siri’ga o‘z istaklarini o‘z so‘zlari bilan tushuntirish imkoniga ega bo‘ladilar.

Yana bir yangilik Apple foydalanuvchilarga sun’iy intellekt yordamida shaxsiy dinamik fon rasmlarini yaratish imkonini beradi.

Avvalroq Kursiv Uzbekistan Apple iOS 27 tizimida turli SI modellarini tanlash imkonini berishi haqida xabar bergan edi.