Voyah kompaniyasi yangi Voyah Passion S modelining rasmiy suratlarini e’lon qildi. Avtomobil 637 ot kuchigacha quvvatga ega bo‘ladi.
Yangi avtomobil texnologik va dinamik SUV sifatida talqin qilinmoqda. U Xitoy bozorida Xiaomi YU7 kabi FUV, ya’ni Fusion Utility Vehicle segmentidagi modellarga raqobatchi bo‘lishi kutilmoqda.
Passion S tashqi dizaynida sport uslubiga urg‘u berilgan. Old qismi keskin chiziqlar, muskulli kapot va havo kanallari bilan ajralib turadi. Kapotdagi ayrim elementlarda karbon tolasi ishlatilishi mumkin. Avtomobil tom qismida LiDAR sensori bilan jihozlangan. Ma’lumotlarga ko‘ra, bu Huawei’ning 896 qatorli ikki optik yo‘lli LiDAR tizimi hisoblanadi.
Yon tomondan model kupe uslubidagi SUV ko‘rinishiga ega. Uning uzunligi 5050 mm, eni 1998 mm, balandligi esa 1656 mmni tashkil etadi. G‘ildirak bazasi 3000 mmga teng.
Bu o‘lchamlar Passion S’ni o‘rta va yirik SUV segmentiga kiritadi. Model 21 dyuymli gunmetal rangdagi forged g‘ildiraklar hamda to‘q sariq tormoz supportlari bilan jihozlangan. Xaridorlar uchun g‘ildirak va tormoz supportlari bo‘yicha qo‘shimcha tanlovlar ham taklif etilishi mumkin.
Orqa qismda katta spoyler va havo oqimini yo‘naltiruvchi bo‘shliqli elementlar joylashgan. Bu detal avtomobilning sport xarakterini kuchaytiradi.
Voyah Passion S ikki xil yuritma tizimida taqdim etiladi. Orqa g‘ildirakdan tortuvchi versiya 300 kVt quvvatga ega bitta motor bilan jihozlanadi. Bu taxminan 402 ot kuchiga teng. To‘liq yuritmali versiyada esa old qismga qo‘shimcha 175 kVtlik motor o‘rnatiladi. Natijada umumiy quvvat 475 kVtga yetadi. Bu 637 ot kuchiga teng.
Avtomobil litiy-temir-fosfat, ya’ni LFP batareyasi bilan jihozlanadi. Model 800V arxitekturasini ham qo‘llab-quvvatlaydi. Bu tez quvvatlash imkoniyatini yaxshilashi kutilmoqda.
Voyah Dongfeng kompaniyasining premium yangi energiyali avtomobillar brendi hisoblanadi. So‘nggi 12 oyda brendning oylik savdosi asosan 10 ming donadan yuqori bo‘lgan. Faqat fevral oyida Xitoydagi Oy taqvimi bo‘yicha Yangi yil ta’tili sababli ko‘rsatkich pastlagan.
Eslatib o‘tamiz, Kursiv Uzbekistan nashri Voyah Taishan X8 avtomobili taqdim etilgani haqida yozgan edi.
