Vivo kompaniyasi 29-may kuni Xitoyda yangi Vivo S60 seriyasini taqdim etadi. Bu haqda Gizmochina nashri xabar bermoqda.
Model qatoriga Vivo S60 va nisbatan soddalashtirilgan Vivo S60 Vitality Edition kirishi kutilmoqda. Ma’lumotlarga ko‘ra, har ikki smartfon 7200 mA/soat sig‘imli akkumulyator bilan jihozlanadi. Qurilmalar 90 vattli tezkor quvvatlashni qo‘llab-quvvatlaydi.
Vivo S60 modeli Qualcomm Snapdragon 8s Gen 3 chipida ishlashi kutilmoqda. Bu protsessor smartfonni o‘rta segmentning yuqori qismiga yaqinlashtiradi. Qurilmaning orqa panelida uchta kamera bo‘ladi. Asosiy kamera 50 MP aniqlikka ega bo‘ladi. Bundan tashqari, 8 MP keng burchakli modul va 50 MP periskop telekamera ham o‘rnatiladi.
Periskop kamerada Sony IMX882 sensori qo‘llanishi aytilmoqda. U 3 karra optik yaqinlashtirish imkoniyatiga ega bo‘ladi. Old kameraning aniqligi ham 50 MPni tashkil etadi. Vivo S60 ultratovushli barmoq izi skaneri bilan ta’minlanadi. Shuningdek, unda stereo dinamiklar va infraqizil port bo‘ladi.
Smartfon IP68 va IP69 standartlari bo‘yicha chang hamda suvdan himoyalanadi. Bu qurilmani namlik va changga chidamliroq qiladi. Vivo S60 Vitality Edition esa arzonroq variant sifatida taqdim etiladi. Ushbu model MediaTek Dimensity 7500 chipida ishlashi kutilmoqda.
Eslatib o‘tamiz, Kursiv Uzbekistan nashri Vivo 9000 mA/soat batareyali Vivo Y600 Turbo smartfonini tayyorlayotgani haqida yozgan edi.
