Lynk & Co kompaniyasi tomonidan Xitoyda Lynk & Co 08 EM-P Max avtomobilining yangi versiyasi sotuvga chiqarildi. Avtomobil elektr rejimida 230 km masofa bosib o‘ta oladi, deya xabar berdi CarNewsChina.
Yangi versiyaning boshlang‘ich narxi chegirmalarsiz 188,8 ming yuan etib belgilandi. Bu taxminan $27,9 mingga teng. Lynk & Co 08 EM-P ilk bor 2023-yil sentabrda Xitoy bozoriga chiqqan edi. Model keyinchalik 2024 va 2025-yillarda kichik yangilanishlar olgan.
China EV DataTracker ma’lumotiga ko‘ra, modelning Xitoydagi umumiy yetkazib berish hajmi 169 ming donaga yetgan. SUV xorijiy bozorlarda, jumladan, Qozog‘istonda ham sotila boshlagan. Yangi Lynk & Co 08 EM-P Max 38,2 kWh sig‘imli LFP batareya bilan jihozlangan. Avval ushbu boshlang‘ich versiyada 28,3 kWh batareya bor edi.
Batareya sig‘imining oshishi hisobiga elektr rejimidagi yurish masofasi 160 km.dan 230 km.gacha ko‘tarildi. Aralash yurish zaxirasi esa 1 400 km.gacha yetadi. Batareya quvvati tugagan holatda avtomobil 100 kmga 4,5 litr yonilg‘i sarflaydi.
Model 19 dyuymli g‘ildiraklar va uzluksiz moslashuvchi amortizatsiya tizimi bilan jihozlangan. Tom qismida LiDAR sensori o‘rnatilgan. Shuningdek, avtomobilda 11 ta kamera, 12 ta ultratovush sensori va uchta mm-to‘lqinli radar bor. Bu ma’lumotlar 200 TOPS quvvatga ega Nvidia Orin-Y chipiga uzatiladi.
Qo‘shimcha imkoniyatlar
Avtomobil shahar yo‘llari va trassalarda Navigate On Autopilot funksiyasini qo‘llab-quvvatlaydi. Salon 15,4 dyuymli katta markaziy ekran bilan jihozlangan. U Apple CarPlay’ni qo‘llab-quvvatlaydi.
Haydovchi oldida 12,3 dyuymli LCD asboblar paneli joylashgan. Shuningdek, 50 W simsiz quvvatlash, isitiladigan va shamollatiladigan old o‘rindiqlar ham bor. Avtomobil 23 ta dinamikka ega audio tizim bilan taklif qilinadi. Yukxona hajmi 545 litrni tashkil qiladi.
Lynk & Co 08 EM-P o‘rta o‘lchamli SUV hisoblanadi. Uning uzunligi 4 825 mm, eni 1 915 mm, balandligi esa 1 660 mm. G‘ildirak bazasi 2 848 mm.ni tashkil qiladi. Model plagin-gibrid tizimga ega. Kaput ostida 1,5 litrli turbomotor joylashgan. U 120 kW yoki 161 ot kuchi ishlab chiqaradi.
Dvigatel uch pog‘onali DHT transmissiyasi va 180 kW, ya’ni 241 ot kuchiga ega elektromotor bilan ishlaydi. Tizimning umumiy quvvati 300 kW yoki 402 ot kuchiga yetadi. Aylanish momenti esa 615 Nm.ni tashkil qiladi.
Avvalroq Kursiv Uzbekistan nashri avtomobil dvigateli qizib ketsa nima qilish kerakligi haqida yozgan edi.
