«Sevgi uchun stavka» shousining ikkinchi mavsumi yangi sonida villada yangi juftlik — Maryam Tillyaeva va Arno Kosyan paydo bo‘ldi. Ularning kelishi darhol kuchlar muvozanatini o‘zgartirdi: Anna Xilkevich Maryamni Yevgeniy Ershovga qarshi koalitsiyada ittifoqchi sifatida ko‘ra boshladi, yangi ishtirokchilar esa tezda boshqalar bilan muzokaralarga kirishdi.
Villaga Maryam Tillyaeva va Arno Kosyan keldi
Villadagi tong kutilmagan syurpriz bilan boshlandi. Ishtirokchilar oshxonaga chiqqanda, to‘kin-sochin dasturxon turgan edi. Juftliklar biror mashhur oshpaz keldi, balki Konstantin Ivlev ham bo‘lishi mumkin, deb o‘ylashdi.
Biroq oshpaz o‘rniga loyihaga yangi ishtirokchilar — Maryam Tillayeva va Arno Kosyan kelgan edi. Yevgeniy Ershov Maryamni darhol tanib, uni yaxshi, lekin oldindan aytib bo‘lmaydigan odam deb atadi.
Anna Xilkevich esa eski tanishi kelganidan xursand bo‘ldi. U Maryam unga Ershov atrofida shakllangan ittifoqlarga qarshi yordam beradi, deb umid qildi.
Arno esa ular shouga faqat sarguzasht uchun emas, balki pul yutib olish va an’anaviy o‘zbek to‘yini o‘tkazish uchun kelganini aytdi.
Yangi ishtirokchilar koalitsiyalar muhokamasiga tushib qoldi
Maryam darhol ishtirokchilardan shouda koalitsiyalar bor-yo‘qligini so‘radi. Xilkevich va Ershov esa deyarli bir vaqtda hech qanday ittifoq yo‘qligini, faqat ayrim kelishuvlar borligini aytdi.
Keyin Xilkevich Maryamni shaxsiy suhbatda Irakliy Pirtsxalavaga qarshi yo‘naltirishga urindi. Ershov esa Arno bilan alohida gaplashdi.
Tez orada Arno va Irakliyni qarindoshlik ildizlari bog‘lab turishi ma’lum bo‘ldi. Maryam esa allaqachon Irakliy bilan ovoz bermaslik bo‘yicha kelishuv tuzganini aytdi.
Erkaklar sinovidan oldingi stavkalar
Erkaklar sinovida, Vlad Topalov so‘zlariga ko‘ra, ishtirokchilarga muvozanat, chidamlilik va haqiqiy erkakcha kuch kerak bo‘lardi. Har bir juftlikka 230 ming rubl ($3,1 ming) ajratildi.
Stavkalar qo‘yilishidan oldin Arno ilgari gimnastika va akrobatika bilan shug‘ullangani ma’lum bo‘ldi. Bu uni darhol sinovning ehtimoliy favoritlaridan biriga aylantirdi.
Anna Prolygina 120 ming ($1,6 ming) rublni Yevgeniy Ershov oxirgi uchlikdan joy oladi, degan fikrga tikdi. Viktoriya Sinitcina esa 120 ming rubl ($1,6 ming)ni Nikita Kachalapovning ikkinchi o‘ringa chiqishiga tikdi.
Maryam Tillyaeva 110 ming (salkam $1,5 ming) rublni Arno ikkinchi o‘rinni oladi, deb tikdi. Anna Xilkevich esa Artyom Martirosyanning g‘alabasiga ishonib, 80 ming ($1,08 ming) rubl tikdi. Elena Grebenshikova esa 110 ming rubl (salkam $1,5 ming)ni Irakliy Pirtsxalavaning uchinchi o‘ringa chiqishiga tikdi.
Artyom Martirosyan sinovni yutdi
Bolg‘a bilan ishlash bosqichida ishtirokchilarga bochka avval o‘ylanganidan ancha mustahkam ekanligi ma’lum bo‘ldi. Uni ezish oson bo‘lmadi. Jarayon davomida Yevgeniy Ershov hatto bolg‘ani sindirib qo‘ydi va keyin charchoqdan yiqilib tushdi.
Arnoga kuch yetishmadi, unda hansirash boshlandi. Artyom o‘z bochkasini teshikka moslab ko‘rdi, ammo u hali yetarlicha bukilmagan edi. Arnoda ham xuddi shunday muammo yuzaga keldi.
Irakliy belida og‘riq sezdi, biroq birinchi o‘rin uchun kurash bochka deformatsiyasini tezroq bajarayotganlar o‘rtasida davom etdi.
Natijada sinovni birinchi bo‘lib Artyom Martirosyan yakunladi. Avval u hafsalasi pir bo‘ldi, chunki Anna Xilkevich uning ikkinchi yoki uchinchi o‘ringa tikkan deb o‘ylagan edi. Keyin esa Xilkevich aynan Artyomning g‘alabasiga pul tikkanligi ma’lum bo‘ldi.
Ikkinchi bo‘lib Arno Kosyan finishga yetib keldi. Bu yangi ishtirokchilar uchun kuchli boshlanish bo‘ldi: Maryam o‘z sherigining natijasidan faxrlanib ketdi.
Erkaklar sinovidan so‘ng qaysi stavkalar o‘tdi
Sinov natijalariga ko‘ra Anna Xilkevichning stavkasi o‘tdi: Artyom Martirosyan birinchi o‘rinni egalladi va juftlik 160 ming rubl ($2,1 ming) ishlab oldi.
Maryam Tillyaevaning stavkasi ham muvaffaqiyatli chiqdi. Arno Kosyan ikkinchi o‘rinni egallagani uchun yangi ishtirokchilar 220 ming rubl (salkam $3 ming) yutishdi.
Shuningdek, Yelena Grebenshchikovaning Irakliy Pirtsxalavaga qilgan stavkasi va Anna Prolygina tomonidan Yevgeniy Ershovning oxirgi uchlikka kirishi haqidagi stavkasi ham o‘tdi.
Viktoriya Sinitcinaning stavkasi esa o‘tmadi: Nikita Kachalapov ikkinchi o‘rinni ololmadi. Shu sababli Nikita va Viktoriya bu bosqichda chiqib ketish xavfi ostida qolgan yagona juftlik bo‘ldi.
Sinovdan so‘ng ishtirokchilar ittifoqlarni qayta ko‘rib chiqishni boshlashdi
Bochkalar bilan o‘tgan sinovdan keyin Anna Xilkevich Artyom Martirosyanga avvalgi kelishuvlarni bekor qilishni taklif qildi, chunki Maryam Tillayeva loyihaga qo‘shilgan edi. Biroq Artyom strategiyani keskin o‘zgartirishga rozi bo‘lmadi.
Yangi ishtirokchilar ham kim bilan birga harakat qilish foydaliroq ekanini muhokama qila boshlashdi. Arno Kosyan Maryamga Yevgeniy Ershovni qo‘llab-quvvatlashga tayyorligini, chunki Xilkevichga ishonmasligini aytdi.
Keyinroq Artyom o‘zi ham Annaga barcha kelishuvlarni bekor qilib, faqat qoidalar asosida o‘ynashni taklif qildi. Ammo bu suhbat ham natijasiz tugadi — ular umumiy qarorga kela olishmadi.
Kuchlanish oshishda davom etdi. Oshxonada Maryam Anna Prolyginaning Yevgeniy Ershov uchun yaxshi ovqat tayyorlamayotganidan norozi bo‘ldi. Arno esa bu fikrni qo‘llab, ayol erkakka g‘amxo‘rlik qilishi kerakligini aytdi.
Viktoriya Sinitcina pul evaziga janjal qilishdan bosh tortdi
Viktoriya Sinitcina pul evaziga katta janjal chiqarish bo‘yicha qo‘shimcha topshiriq oldi. Unga janjal qilib, buning evaziga 50 ming rubl ($678) ishlab olish taklif qilindi.
Biroq Vika bu topshiriqni bajarishdan bosh tortdi. U Nikita Kachalapov bilan munosabatlari qo‘shimcha puldan muhimroq ekanini aytdi.
Keyinchalik Vlad Topalov bu topshiriq haqida Nikitaga aytdi. Kachalapovning reaksiyasidan u bunday imkoniyatdan voz kechmagan bo‘lardi, degan fikr paydo bo‘ldi, ammo Viktoriya allaqachon o‘z qarorini qilib bo‘lgan edi.
Erkaklar ayollar sinoviga stavka qo‘ydi
Ayollar sinovi oldidan stavkalarni erkaklar qo‘ydi. Vlad Topalov bu safar faqat uchta o‘rin bo‘lishini, to‘rtinchi va beshinchi o‘rinlar nazarda tutilmaganini ma’lum qildi. Ishtirokchilar mexanizmlar bilan ishlashi kerak bo‘lgani uchun ulardan sabr-toqat, diqqat va harakatlarning aniqligi talab etilardi.
Nikita Kachalapov Viktoriyaning g‘alabasiga ishonishini aytib, o‘zidagi barcha 110 ming rubl (salkam $1,5 ming)ni uning birinchi o‘rinni egallashiga tikdi.
Artyom Martirosyan Anna Xilkevichning uchinchi o‘rin olishi uchun 150 ming rubl ($2 ming) tikdi. Yevgeniy Ershov esa Anna Prolyginaning ikkinchi o‘rinni egallashiga 110 ming rubl (salkam $1,5 ming) qo‘ydi.
Arno Kosyan Maryam Tillayevaning uchinchi o‘rinni olishi uchun 120 ming rubl ($1,6 ming) tikkan bo‘lsa, Irakliy Pirtsxalava Elena Grebenshchikovaning uchinchi o‘rin bilan yakunlashiga 120 ming rubl ($1,6 ming) tikdi.
Sinov boshlanishidan oldin Ershov erkaklar bosqichida Arnoni ataylab oldinga o‘tkazib yuborganini tan oldi. Uning aytishicha, bu orqali Maryamning stavkasi yutishini istagan.
Ayollar sinovi: muvozanat, ichimlik va kolbalar
Ayollar sinovida ishtirokchilar ichimlik qo‘yilgan platformani muvozanatda ushlab turishi, stakandan ichib olishi va shundan so‘ng kolbani raqiblaridan tezroq to‘ldirishi kerak edi.
Anna Xilkevich sinovga uncha yaxshi kayfiyatda chiqmadi. Maryam Tillayeva esa aksincha qat’iy kayfiyatda edi, biroq darhol qiyinchiliklarga duch kelib, asabiylasha boshladi.
Anna Prolygina vazifani xotirjam bajardi va tez orada peshqadamlikni qo‘lga oldi. Xilkevich dastlab muvozanatni yo‘qotdi, ammo keyinchalik mexanizmga moslashib oldi. Viktoriya Sinitcina ham boshida ritmga kira olmadi, biroq keyinchalik vazifani ancha yaxshi bajara boshladi.
Sinovni birinchi bo‘lib Anna Prolygina yakunladi. Vlad Topalovning ta’kidlashicha, bu bosqichda tomoshabinlar mehrini qozonish mukofoti bo‘lganida, u albatta hissiyotlarga boy ishtiroki sabab Maryam Tillayevaga nasib etgan bo‘lardi.
Ikkinchi bo‘lib Yelena Grebenshchikova finishga yetib keldi. Uchinchi o‘rinni esa Anna Xilkevich egalladi.
Villada yangi muzokaralar boshlandi
Qizlar oftob ostida sinovdan o‘tayotgan paytda, yigitlar massajdan bahramand bo‘lishdi. Keyinchalik ishtirokchi qizlar o‘z juftlarini shu holatda ko‘ridi, biroq bu jiddiy mojaroga sabab bo‘lmadi.
Asosiy taranglik villaga qaytilgandan keyin boshlandi. Ishtirokchilar kichik guruhlarga bo‘linib, ovoz berish masalasini muhokama qila boshladi va marosim oldidan o‘zaro kelishuvlarga erishishga urindi.
Anna Xilkevich Yevgeniy Ershovga uning kelini boshqa ishtirokchilar bilan muloqotga kirishmayotganini aytib, juftliklar o‘rtasidagi avvalgi kelishuvlar endi so‘roq ostida qolayotganini bildirdi. Shundan so‘ng Ershov Anna Prolyginaga bosim o‘tkazishga urinib, undan yoqtirmaydigan ishtirokchilar bilan ham aloqa o‘rnatishni talab qildi.
Xilkevich va Martirosyan juftligi ichida ham yakdil fikr yo‘q edi. Ular qaysi ishtirokchilarni qo‘llab-quvvatlash masalasida bir qarorga kela olishmadi.
Maryam Tillayeva esa sinovda qatnashib yurgan paytda Arno uning ishtirokisiz ayrim qarorlarni qabul qilganidan norozi bo‘ldi.
Ovoz berish natijasi: Irakliy va Yelena nomzodlar qatoriga tushdi
Ikkinchi kun oqshomida ovoz berish marosimi bo‘lib o‘tdi. Muvaffaqiyatsiz stavkalardan so‘ng Nikita Kachalapov va Viktoriya Sinitcina loyihani tark etish xavfi ostidagi asosiy juftlik bo‘lib qolayotgandi. Ikkinchi nomzod juftlikni esa ishtirokchilarning o‘zi belgilashi kerak edi.
Ovoz berish yakunlariga ko‘ra, Irakliy Pirtsxalava va Yelena Grebenshchikova nomzodlar qatoridan joy oldi. Juftliklarning aksariyati aynan shu variantni qo‘llab-quvvatladi. Irakliy va Yelena esa o‘z navbatida Maryam Tillayeva va Arno Kosyan hamda Yevgeniy Ershov va Anna Prolygina juftliklariga qarshi ovoz berdi.
Boshlovchi ko‘pchilik tomonidan avval kompaniyaning «joni» deb atalgan Irakliyga qarshi ovoz berilganidan hayratlandi. Biroq bunga oddiy izoh berildi: erkaklar oldindan eng kam pul ishlab topgan ishtirokchilarni nomzodlar qatoriga chiqarish haqida kelishib olgan edi. Ayollar bu yondashuvga qo‘shilmagan bo‘lsa-da, yakuniy qaror umumiy kelishuv asosida qabul qilindi.
Pirtsxalava ovoz berish natijasini og‘ir qabul qildi va Yevgeniy Ershovdan ranjidi. Uning fikricha, Ershov avval tuzilgan o‘zaro hujum qilmaslik kelishuvini buzgan edi. Marosimdan keyin esa taranglik yanada kuchaydi.
Yelena yuz berayotgan voqealardan charchaganini tan oldi. Anna Xilkevich esa yangi ishtirokchilarni Ershovning ta’siri ostida ekaniga ishontirishga harakat qildi. Arno Kosyan qarorlarni mustaqil qabul qilishini aytdi, biroq Maryam Tillayeva Xilkevichning so‘zlari haqida jiddiy o‘ylab qolgandek taassurot qoldirdi.
Loyihani tark etish sinovi: mixlar va arqondan yasalgan kapalak
Tarang nonushtadan keyingi kuni nomzod juftliklar loyihani tark etish sinovida ishtirok etdi. Hal qiluvchi bahs Nyana Tilem Wood Carving Museum hududida bo‘lib o‘tdi. Sinovni Vlad Topalov boshqardi.
Nikita Kachalapov va Irakliy Pirtsxalava o‘z juftlariga yo‘l-yo‘riq ko‘rsatishi kerak edi. Erkaklar konstruktsiyaning bir tomonida turib, parda ortidagi rasmga qarashdi va mix qoqilishi kerak bo‘lgan nuqtalarni aytib turishdi. Konstruktsiyaning boshqa tomonidagi Viktoriya Sinitcina va Yelena Grebenshchikova esa ko‘rsatilgan joylarga mix qoqishdi.
Shundan so‘ng qizlar mixlar orasidan arqon tortib, berilgan namunadagi kapalak shaklini hosil qilishi kerak edi. Vazifani tezroq va aniqroq bajargan juftlik g‘olib deb topilardi.
Musobaqa davomida har ikki jamoa ham xatolarga yo‘l qo‘ydi. Nikita va Viktoriya o‘z vaqtida kamchiliklarni payqab, rasmni to‘g‘rilashga muvaffaq bo‘ldi. Elena esa bir payt sxemaning o‘rtasidagi xatoni sezmay qoldi, natijada juftlik qimmatli vaqtni boy berdi.
Yakunda Nikita Kachalapov va Viktoriya Sinitcina birinchi bo‘lib to‘g‘ri rasmni yig‘ishga muvaffaq bo‘ldi. Bu figurali uchuvchilar juftligi uchun to‘rt son ichidagi uchinchi nomzodlik va loyihani tark etish sinovidagi ketma-ket uchinchi g‘alaba bo‘ldi.
Nikita Kachalapov va Viktoriya Sinitcina shouni ixtiyoriy ravishda tark etdi
G‘alabaga erishganiga qaramay, Nikita Kachalapov va Viktoriya Sinitcina loyihani tark etishga qaror qildi. Villaga qaytgach, ular boshqa ishtirokchilarga «Sevgi uchun stavka» shousidan o‘z ixtiyori bilan ketayotganini ma’lum qildi.
Juftlik bu qarorini o‘zaro munosabatlarida muammo yo‘qligi bilan izohladi. Ularning fikricha, ayni paytda loyihadagi ishtirok Irakliy Pirtsxalava va Yelena Grebenshchikova uchun muhimroq. Figurali uchuvchilar sinovlar sobiq turmush o‘rtoqlarga bir-birini yaxshiroq tushunish va his-tuyg‘ulariga aniqlik kiritishga yordam berishi mumkinligini ta’kidladi.
Bu xabar Anna Xilkevichni xafa qildi. Chunki Nikita va Viktoriya ketganidan so‘ng uning juftligi ovoz berishlarda ishonchli tayanchidan ayrildi. Yelena Grebenshchikova ham vaziyatni hissiyot bilan qabul qildi, chunki endi u loyihadagi ishtirokini Irakliy bilan davom ettirishi kerak bo‘ladi.
Figurali uchuvchilar ketganidan keyin Yevgeniy Ershov va Anna Prolyginaning holati yanada murakkablashdi. Xilkevich ularga ochiqchasiga qarshi, yangi ishtirokchilar esa hali ularga to‘liq ishonmayapti. Bundan tashqari, Irakliy Ershovni xiyonat qilgan deb hisoblaydi. Shu bois Ershov va Prolygina juftligi uchun loyihada qolishning asosiy yo‘li aniq stavkalar qilish va yangi kelishuvlarga erishish bo‘lib qolmoqda.
