Avstraliyaning CarExpert nashri 2026-yilning eng yaxshi oilaviy elektromobillari reytingini tuzdi. Tanlovda shahar uchun mo‘ljallangan ixcham modellar ham, katta oilalar uchun ishlab chiqilgan yirik krossoverlar ham bor.
Hyundai Inster kichik oilalar uchun qulay variant bo‘ldi
Hyundai Inster reytingda kichik oilalar uchun eng maqbul elektromobillardan biri sifatida qayd etildi. Model ixcham o‘lchamlariga qaramay, ichki kengligi bilan ekspertlarni hayratlantirgan.
CarExpert mualliflari avtomobilning ikkinchi qatori qulay ekanini ta’kidladi. Salon amaliy foydalanish uchun moslashtirilgan. Shu sababli Inster shahar ichida harakatlanadigan oilalar uchun qulay tanlov bo‘lishi mumkin.
Model versiyasiga qarab bir quvvat bilan 293 km dan 360 km gacha yo‘l bosadi. Bu ko‘rsatkich kundalik qatnov, maktab, ish va shahar atrofidagi qisqa safarlar uchun yetarli hisoblanadi.
Jaecoo J5
Reytingdagi kutilmagan ishtirokchilardan biri Xitoyning Jaecoo J5 modeli bo‘ldi. Nashrga ko‘ra, ushbu elektromobil oilaviy foydalanish uchun ancha amaliy imkoniyatlarga ega. Avtomobilning ikkinchi qatoriga birdaniga uchta bolalar o‘rindig‘ini joylashtirish mumkin. Bagaj qismi esa ikki kishilik bolalar aravachasini sig‘dira oladi.
Jaecoo J5 elektroversiyasining yurish masofasi 400 km gacha yetadi. Bu ko‘rsatkich uni kundalik foydalanish bilan birga uzoqroq safarlar uchun ham qulay qiladi.
Kia EV3
Kia EV3 ekspertlar tomonidan yirik SUV sinfiga o‘tmasdan, amaliy elektromobil izlayotgan oilalar uchun tavsiya qilindi. Model ixchamroq kuzovda yetarlicha keng salon va yaxshi texnik imkoniyatlarni taklif etadi.
Avtomobilning ikkinchi qatoriga uchta bolalar o‘rindig‘ini o‘rnatish mumkin. Salon ichida ish yoki kundalik foydalanish uchun tortib chiqariladigan stolcha ham bor.
Kia EV3 maishiy elektr rozetkasi bilan ham jihozlangan. Bu uzoq yo‘lda gadjetlar yoki kichik qurilmalarni ishlatishda foydali bo‘lishi mumkin.
Model versiyasiga qarab bir quvvat bilan 604 km gacha yo‘l bosadi. Bu ko‘rsatkich EV3’ni oilaviy elektromobillar orasida eng uzoq yuradigan variantlardan biriga aylantiradi.
Hyundai Ioniq 5
Hyundai Ioniq 5 reytingdagi eng muvozanatli modellardan biri sifatida ko‘rsatildi. Ekspertlar uning keng saloni, sig‘imli bagaji va juda tez quvvatlanish imkoniyatini yuqori baholadi.
Avtomobil bir quvvat bilan 570 km gacha yo‘l bosishi mumkin. Bu oilaviy safarlar, shaharlararo qatnov va kundalik foydalanish uchun yetarli ko‘rsatkich hisoblanadi. Modelda bolalar bilan safar qilishni qulaylashtiradigan maxsus rejimlar ham mavjud. Shuningdek, ichki quyoshdan himoya pardalari yo‘lovchilar uchun qo‘shimcha qulaylik yaratadi.
Ioniq 5 dizayn va texnologiya jihatidan ham Hyundai’ning eng taniqli elektromobillaridan biri bo‘lib qolmoqda. Shu sababli u amaliy va zamonaviy elektromobil izlayotgan oilalar uchun mos variant sifatida ko‘rilmoqda.
Kia EV9
Katta oilalar uchun ekspertlar Kia EV9 modelini alohida tavsiya qildi. Bu to‘laqonli yetti o‘rinli elektromobil bo‘lib, uch qatorli salon bilan jihozlangan.
Model bir vaqtning o‘zida beshtagacha bolalar o‘rindig‘ini sig‘dira oladi. Uchinchi qator ham yetarlicha keng bo‘lgani uchun katta oilalar uchun qulaylik yaratadi.
Kia EV9 bir quvvat bilan 512 km gacha yo‘l bosadi. Bu yirik elektromobil uchun yaxshi natija hisoblanadi.
Reytingga boshqa modellar ham kiritildi
CarExpert reytingida yuqoridagi modellardan tashqari boshqa elektromobillar ham bor. Ular orasida GAC Aion UT elektr xetchbeki, Volkswagen ID. Buzz miniveni, Volvo EX90 va Hyundai Ioniq 9 oilaviy krossoverlari qayd etilgan.
Ekspertlar tanlovi shuni ko‘rsatadiki, oilaviy elektromobillar bozori tez kengaymoqda. Endi xaridorlar faqat yurish masofasi yoki narxga emas, balki salon kengligi, bolalar o‘rindig‘i uchun joy, bagaj sig‘imi va kundalik qulayliklarga ham katta e’tibor qaratmoqda.
Avvalroq Kursiv Uzbekistan nashri Chevrolet Onix 2027 yangi versiyalar bilan to‘ldirilgani haqida yozgan edi.
