Motorola kompaniyasi Motorola Edge 70 Fusion smartfoni lineykasini kengaytirdi. Bu haqda GSMArena nashri xabar bermoqda.
Model 12 gigabayt tezkor va 512 gigabayt ichki xotiraga ega yangi konfiguratsiyada ham sotuvga chiqariladi. Avvalroq Motorola Edge 70 Fusion maksimal 256 gigabayt ichki xotira bilan taklif etilgan edi. Yangi versiya Hindistonda 37 ming rupiyaga baholandi. Bu taxminan 390 dollarga teng.
Smartfon Motorola’ning Pantone ranglarida taqdim etiladi. Shu bilan birga, xotira hajmi va bozorga qarab, bazaviy versiyalar nisbatan arzonroq narxda sotuvda qoladi.
Qurilmaning qolgan texnik xususiyatlari o‘zgarishsiz saqlangan. Motorola Edge 70 Fusion 6,78 dyuymli AMOLED ekran bilan jihozlangan. Displey 144 Hz yangilanish chastotasi va 5200 nitgacha maksimal yorqinlikni qo‘llab-quvvatlaydi.
Smartfon Snapdragon 7s Gen 4 platformasi asosida ishlaydi. Modelning asosiy jihatlaridan biri kamerasi hisoblanadi. Motorola Edge 70 Fusion 50 megapikselli Sony LYT-710 sensori bilan jihozlangan dunyodagi ilk smartfon sifatida taqdim etilgan. Asosiy kamera optik stabilizatsiya va fazali fokuslash texnologiyasini qo‘llab-quvvatlaydi.
Bundan tashqari, qurilmada 13 megapikselli ultra keng burchakli kamera va 32 megapikselli old kamera mavjud. Motorola Edge 70 Fusion 7000 mA/soat sig‘imli akkumulyator bilan jihozlangan. U 68 vattli tezkor quvvatlash texnologiyasini qo‘llab-quvvatlaydi.
Avvalroq «Kursiv» eng trenddagi 10 ta smartfon haqida yozgan edi.
