SpaceX aksiyalari 16 foizga tushib ketdi
Ilon Maskning SpaceX kompaniyasi aksiyalari 22-iyun kungi savdolar yakunida 16 foizdan ko‘proqqa arzonlashdi.
Bloomberg ma’lumotlariga ko‘ra, bunga kompaniyaning sun’iy intellekt yo‘nalishidagi rejalar uchun obligatsiyalar chiqarishni rejalashtirgani sabab bo‘lgan. SpaceX aksiyalari uchinchi kun ketma-ket pasaymoqda.
Kompaniya aksiyalari IPOdan keyingi ilk savdolarda ochilgan $150 narxiga juda yaqinlashdi. Hozir u ushbu ko‘rsatkichdan atigi $4,6 yuqorida turibdi.
SpaceX, shuningdek, dunyodagi eng qimmat ommaviy kompaniyalar reytingida oltinchi o‘rinni TSMC kompaniyasiga boy berib, yettinchi o‘ringa tushdi.
Sun’iy intellekt rejalari uchun $20 milliardlik qarz dasturi
Dushanba kuni kompaniya ilk bor investitsiya darajasidagi obligatsiyalarni joylashtirishini ma’lum qilgan edi. Joylashtirish hajmi $20 mlrd bo‘lishi mumkin.
Bu mablag‘ SpaceX’ning sun’iy intellekt bo‘yicha yirik rejalari uchun qarz jalb qilish dasturining bir qismi sifatida baholanmoqda.
Texnologik sektor va IT-gigantlar
Texnologik sektor umumiy hisobda ham bosim ostida qoldi. Nasdaq Composite indeksi 1,33 foizga pasaydi. S&P 500 indeksi 0,37 foizga tushdi. Dow Jones Industrial Average esa 0,29 foizga o‘sdi.
Texnologik gigantlar aksiyalari ham arzonlashdi. Alphabet aksiyalari 5 foizga tushdi. Bunga Google DeepMind vitse-prezidenti Jon Jamperning Anthropic kompaniyasiga o‘tishi haqidagi xabar sabab bo‘ldi.
Amazon aksiyalari 4,8 foizga, Meta Platforms 2,3 foizga, Microsoft esa 3,2 foizga pasaydi.
Makroiqtisodiy omillar va neft bozoridagi pasayish
Bozordagi kayfiyatga AQSh g‘aznachilik obligatsiyalari daromadliligi oshgani ham bosim o‘tkazdi.
Shu bilan birga, AQSh va Eron o‘rtasidagi muzokaralarda siljish bo‘lgani haqidagi xabarlar neft narxining pasayishiga olib keldi. Brent fyucherslari 3 foizga, $78,2 gacha, WTI esa 2 foizga, $74,2 gacha tushdi.
Investorlar endi AQShda payshanba kuni e’lon qilinadigan may oyidagi PCE inflyatsiya indeksini kutmoqda. Bu ko‘rsatkich Federal zaxira tizimi uchun muhim inflyatsiya indikatori hisoblanadi.
Ekspertlar prognozi: AI atrofidagi ralli davom etadimi
Tahlilchilarga ko‘ra, bozor uchun asosiy xavflardan biri sun’iy intellekt atrofidagi ralliga bo‘lgan ishonchning pasayishi bo‘lishi mumkin. Shu bilan birga, ayrim ekspertlar texnologik kompaniyalar aksiyalari AI infratuzilmasiga xarajatlar ortayotgani sabab yana bir necha chorak davomida o‘sishi mumkinligini ta’kidlamoqda.
Eslatib o’tamiz, avvalroq SpaceX Falcon 9 uchirishlari orasidagi vaqt bo‘yicha yangi rekord o‘rnatgandi. Uchirishlar SLC-4E start majmuasidan amalga oshirilgan. Ushbu kompleks odatda qutbiy va Quyosh-sinxron orbitalarga mo‘ljallangan missiyalar uchun ishlatiladi. Navbatdagi parvoz vaqtida Falcon 9 raketasi orbitaga yana 24 ta Starlink sun’iy yo‘ldoshini olib chiqdi.
