Jahon chempionati guruh bosqichida Kolumbiya Kongo terma jamoasiga qarshi o‘yinda g‘alaba qozondi. Guadalaxaradagi «Estadio Guadalaxara» stadionida o‘tgan uchrashuv janubiy amerikaliklar ustunligi bilan yakunlandi.
Birinchi bo‘limda hisob ochilmadi. Kolumbiya ko‘proq tashabbusga ega bo‘ldi, biroq Kongo DR darvozaboni Lionel Mpasi bir necha bor jamoasini qutqarib qoldi. Tanaffusga qadar Kolumbiya ko‘plab zarbalar yo‘lladi, ammo afrikaliklar himoyasi bosimga bardosh berdi.
Ikkinchi bo‘limda ham Kolumbiya hujumdagi faolligini saqlab qoldi. Luis Dias, Daniel Munyos va Xames Rodriges raqib himoyasiga bosim o‘tkazdi. 59-daqiqada Kolumbiya safida Xames Rodriges va Luis Suares o‘rniga Jon Kordoba hamda Xuan Kintero maydonga tushdi.
76-daqiqada Kolumbiya nihoyat hisobni ochdi. Jon Kordoba to‘pni himoyachilardan berkitib, Daniel Munyosga qulay vaziyat yaratib berdi. Munyosning zarbasi yo‘nalishini o‘zgartirib, yaqin burchakdan darvozaga kirib ketdi. Bu uning turnirdagi ikkinchi goli bo‘ldi.
Kongoliklar yaratgan vaziyatlar
Kongo DR ham ayrim xavfli vaziyatlar yaratdi. Yoan Vissa jarima maydonida zarba berishga urindi, keyinroq zaxiradan tushgan Charlz Pikelning boshi bilan yo‘llagan zarbasi aniq chiqmadi. Artur Masuaku va Aaron Van-Bissaka qanotlardagi faolligi bilan Kolumbiya himoyasini bir necha bor qiynadi.
80-daqiqada Luis Dias to‘pni darvozaga kiritgandek bo‘ldi, biroq hakamlar avvalgi epizodda raqib himoyachisiga nisbatan qoida buzilganini qayd etdi va gol bekor qilindi. Oradan biroz o‘tib Dias yana bir vaziyatda to‘pni darvozaga yo‘lladi, ammo bu safar ofsayd sababli gol inobatga olinmadi.
Avvalroq «Kursiv» Angliya va Gana o‘rtasidagi bahsda g‘olib aniqlanmagani haqida yozgan edi.
