Toshkent YI bilan migratsiya markazlarini tashkil etish bo‘yicha muzokara olib bormayapti — TIV
O‘zbekiston Tashqi ishlar vazirligi (TIV) boshpana berish rad etilgan migrantlar uchun markazlar tashkil etish bo‘yicha Yevropa Ittifoqi (YI) bilan muzokaralar olib borilayotgani haqidagi xabarlarni rad etdi. Bu haqda Kursiv Uzbekistan’ga vazirlik matbuot xizmati ma’lum qildi.
Politico ma’lumotlariga ko‘ra, shunga o‘xshash markazlarni Ruanda va Ugandada ham ochish taklif qilinmoqda. Bu qarorga Fransiya va Ispaniya qarshi chiqmoqda.
YIda bunday markazlar tashkil etilishini kimlar qo‘llab-quvvatlamoqda
24-iyun kuni Politico nashri «YI migrantlarni qaytarish markazlarini Ruanda va O‘zbekistonda tashkil etish imkoniyatini ko‘rib chiqmoqda» nomli materialni e’lon qildi.
Nashrning yozishicha, bunday markazlarni tashkil etish tashabbusini Yevropa Ittifoqiga a’zo qator davlatlar qo‘llab-quvvatlagan. Ular orasida Germaniya va Daniya ham bor. Migrantlar uchun dastlabki xablarni kelasi yili ochish rejalashtirilayotgani aytilmoqda.
«Davlatlar hukumatlari Ruanda va O‘zbekistonga qiziqish bildirayotgan bo‘lsa-da, bu YI darajasida tasdiqlangan. Biroq alohida kelishuvlar tuzish huquqi hanuz har bir hukumatning o‘z vakolatida qolmoqda», — deb yozadi Politico.
Bryussel Ruandadan tashqari yana bir Afrika davlatida — Ugandada ham shunday xablar ochish imkoniyatini ko‘rib chiqmoqda. Shu bilan birga, Misr va Liviya migrantlar kontrabandasi xavfi sababli yevropalik amaldorlar tomonidan variant sifatida ko‘rilmayapti.
Kipr migratsiya vaziri Nikolas Ioannidisning so‘zlariga ko‘ra, umumiy g‘oya migratsiya markazlarini Yevropa davlatlari chegaralarida emas, balki Afrika va Osiyoda ochishdan iborat.
Biroq YIda bu g‘oyaga qarshilar ham bor
Bryusselning bunday markazlarni ochish g‘oyasiga BMT Qochqinlar bo‘yicha oliy komissarligining Bryusseldagi vakili Jan-Nikola Byoz shubha bilan qaradi. U migrantlar muammosini bunday yo‘l bilan hal qilishni populistik qaror deb atadi. Fransiya va Ispaniya hukumatlari ham bu tashabbusga qarshi chiqmoqda.
«Men uchinchi davlatlardagi qaytarish markazlari haqiqatan ham ishlaganini hech qachon ko‘rmaganman», — dedi Fransiya prezidenti Emmanuel Makron o‘tgan hafta Bryusselda.
Bu OAVda Bryussel O‘zbekistonda migratsiya markazlarini ochmoqchi ekani haqida xabarlar paydo bo‘layotgan birinchi holat emas. Joriy yil iyun oyi boshida ham O‘zbekiston TIV bunday xabarlarni rad etib, Toshkent bu masala bo‘yicha muzokara olib bormayotgani va uni muhokama qilishni rejalashtirmayotganini ta’kidlagan edi.
Avvalroq «Kursiv» Fransiya elchixonasi vizaga oid firibgarliklardan ogohlantirgani haqida yozgan edi.
