Yaponiyaning Kioto shahrida dunyodagi ilk yumshoq o‘yinchoqlarga bag‘ishlangan ibodatxona ish boshladi. Bu haqda Dexerto nashri xabar berdi.
Bu yerda odamlar o‘zlarining sevimli o‘yinchoqlari uchun ibodat qilishi, ularga minnatdorlik bildirishi va xotira marosimlarini o‘tkazishi mumkin.
Bolalik xotiralarini asrash uchun yaratilgan maskan
Nuigurumi Jinja nomli ibodatxona yumshoq o‘yinchoqlarni ta’mirlash bilan shug‘ullanuvchi kompaniya tomonidan tashkil etilgan. Loyiha mualliflarining aytishicha, maqsad bolalik va hayot davomida insonlarga hamroh bo‘lgan o‘yinchoqlar bilan munosib xayrlashish uchun maxsus maskan yaratishdan iborat.
Ibodatxona bayonotida ta’kidlanishicha, bu maskan yumshoq o‘yinchoqlar, tabiat va barcha tirik mavjudotlarga hurmat bajo keltirish, shuningdek, insonning tabiat, jamiyat va ajdodlar bilan uyg‘unligini mustahkamlash g‘oyasini targ‘ib qiladi.
Ayiqcha uslubidagi ibodatxona
Ibodatxona hududida yumshoq o‘yinchoqlar mavzusida bezatilgan bir nechta inshootlar mavjud. Jumladan, ayiq shaklidagi derazaga ega somon tomli ibodat zali, yumshoq uslubda ishlangan qo‘riqchi sher haykallari va ayiq quloqlariga o‘xshash bezaklarga ega torii darvozasi bunyod etilgan.
Kelgusida bu yerda xotira marosimlaridan so‘ng yumshoq o‘yinchoqlarning kulini saqlash uchun maxsus memorial zal ham qurilishi rejalashtirilgan.
Avvalroq Kursiv Uzbekistan 1-iyuldan Yaponiyada bir martalik viza narxi 93 dollar bo‘lishi haqida yozgandi.
