Fransiyadagi jazirama oqibatida o‘limlar soni mingdan ortdi

Yevropadagi jazirama to‘lqini Fransiyada mingdan ortiq qo‘shimcha o‘lim qayd etilishiga sabab bo‘ldi. Bu haqda Reuters agentligi ma’lum qildi.

Mamlakat Jamoat salomatligi agentligi ma’lumotlariga ko‘ra, jazirama tufayli 1 mingta ortiqcha o‘lim qayd etilgan. Agentlik bu ko‘rsatkich yakuniy emasligini, qariyalar uylari va xonadonlardagi o‘limlar bo‘yicha ma’lumotlar kelishi bilan qurbonlar soni yanada ortishi mumkinligini bildirdi.

Qurbonlarning aksariyati keksalar

Qayd etilishicha, vafot etganlarning asosiy qismini 65 yosh va undan katta fuqarolar tashkil etadi. Shu bilan birga, sog‘liq uchun xavf barcha yosh toifalariga ta’sir ko‘rsatgan.

Fransiya sog‘liqni saqlash vaziri Stefani Ristning aytishicha, havo harorati pasaya boshlaganidan keyin ham jaziramaning salbiy oqibatlari yana 10 kungacha saqlanib qolishi mumkin. U vaziyat hali yakunlanmaganini ta’kidladi.

Jazirama sharqqa siljimoqda

Meteorologlarning qayd etishicha, jazirama to‘lqini asta-sekin Yevropaning sharqiy qismiga siljimoqda. Fransiyaning aksariyat hududlarida havo harorati pasaygan bo‘lsa-da, mamlakatning shimoli-sharqidagi ayrim hududlarda jazirama bo‘yicha ogohlantirishlar hanuz amal qilmoqda.

20-iyundan boshlangan ushbu issiq to‘lqini Yevropa tarixidagi eng kuchli jazirama bo‘lib, qit’ada harorat global o‘rtacha ko‘rsatkichga nisbatan tezroq oshib bormoqda. Issiq ob-havo elektr energiyasi ishlab chiqarishiga, infratuzilmaga va aholi salomatligiga jiddiy ta’sir ko‘rsatmoqda.

Eslatib o‘tamiz, avvalroq Venesueladagi zilzila qurbonlari soni 1,4 ming nafardan oshgani haqida yozgan edik.