Huawei kompaniyasi xalqaro bozor uchun yangilangan FreeClip 2 S simsiz quloqchinlarini taqdim etdi. Bu haqda GSM Arena nashri ma’lum qildi.
Yangi g‘ilof va yangilangan dizayn
FreeClip 2 S avval Xitoyda FreeClip 2 Collector’s Edition nomi ostida taqdim etilgan modelning xalqaro bozordagi talqini hisoblanadi. Qurilma yangi zaryadlash g‘ilofiga ega bo‘lib, u deyarli sharsimon shaklda, kattaroq o‘lchamda va kompaniya ma’lumotiga ko‘ra, ichki hajmi avvalgi modelga nisbatan 20 foizga kengaytirilgan.
G‘ilof nafaqat quloqchinlarni, balki kichik aksessuarlar yoki taqinchoqlarni ham saqlash imkonini beradi. Shuningdek, quloqchinlarning konstruksiyasi va tashqi dizayni ham avvalgi avlodga nisbatan takomillashtirilgan.
Texnik xususiyatlari
FreeClip 2 S 10,8 millimetrli ikki membranali dinamiklar bilan jihozlangan. Qurilma ovoz balandligini avtomatik moslashtirish, ovozni uzatishni yaxshilash, uchta mikrofon asosidagi qo‘ng‘iroqlar uchun shovqinni kamaytirish tizimi hamda IP57 darajasidagi suv va changdan himoyani qo‘llab-quvvatlaydi.
Bundan tashqari, quloqchinlar qaysi quloqqa taqilganini avtomatik aniqlaydi va audio kanallarni mos ravishda almashtiradi. Shuningdek, sensorli boshqaruv va bosh harakatlari orqali boshqarish funksiyalari ham mavjud.
Narxi
Qurilma Bluetooth 6.0 orqali ishlaydi. U bir marta quvvatlanganda 9 soatgacha, zaryadlash g‘ilofi bilan birgalikda esa 38 soatgacha ishlash imkonini beradi. Huawei FreeClip 2 S quloqchinlarining Yevropadagi narxi 230 yevroni tashkil qiladi.
Eslatib o‘tamiz, avvalroq Nothing Ear (3a) quloqchinlari taqdimot oldidan namoyish etilgan edi.
