Bangladeshda qizamiq qurbonlari soni 779 nafarga yetdi

Bangladeshda qizamiq epidemiyasi bilan bog‘liq tasdiqlangan va gumon qilingan o‘limlar soni 779 taga yetdi. Bu haqda Anadolu agentligi xabar bermoqda.

So‘nggi bir sutka ichida qizamiqqa o‘xshash alomatlar kuzatilgan yana sakkiz nafar bola vafot etdi. Bangladesh Sog‘liqni saqlash vazirligi huzuridagi Sog‘liqni saqlash xizmatlari bosh boshqarmasi ma’lumotiga ko‘ra, qayd etilgan o‘limlarning 95 tasi laboratoriya tekshiruvlari orqali qizamiq bilan bog‘liqligi tasdiqlangan. Yana 684 ta holat esa kasallikka aloqador deb gumon qilinmoqda.

Mamlakatda bir sutkada 974 ta yangi gumon qilingan kasallanish holati aniqlangan. Shu tariqa 2026-yilda Bangladesh bo‘ylab qayd etilgan gumon qilingan qizamiq holatlari soni 115 138 taga yetdi.

Bangladesh hukumati bolalar o‘rtasida kasallanish va o‘lim holatlari keskin ko‘paygani sababli 7-apreldan favqulodda emlash kampaniyasini boshlagan. Dastlab yuqori xavf ostidagi hududlarda olti oylikdan besh yoshgacha bo‘lgan bolalarni qizamiq va qizilchaga qarshi emlash rejalashtirilgan, keyinchalik kampaniya ko‘lami kengaytirilgan.

Jahon sog‘liqni saqlash tashkiloti aprel oyidayoq epidemiya Bangladeshning 64 ta tumanidan 58 tasiga tarqalganini bildirgan edi. Mutaxassislar kasallikning tez yoyilishini rejali emlash qamrovi pasaygani va emlanmagan bolalar soni ortgani bilan bog‘lamoqda.

Avvalroq «Kursiv» Kongoda Ebola qurbonlari soni 500 nafardan oshgani haqida yozgan edi.