21 – 24-iyul kunlari tog‘li hududlarda sel xavfi e’lon qilindi
«O‘zgidromet» 21 – 24-iyul kunlari kutilayotgan yomg‘irlar sabab ayrim tog‘oldi va tog‘li hududlarda sel-suv toshqinlari yuzaga kelishi mumkinligi haqida ogohlantirdi. Aholi, dam oluvchilar va haydovchilardan ehtiyot choralarini ko‘rish so‘raldi.
Qaysi hududlarda xavf bor
- Toshkent viloyati: Ohangaron, Bo‘stonliq, Parkent, Piskent, O‘rta Chirchiq, Yuqori Chirchiq tumanlarida va Angren, Olmaliq shaharlarida;
- Namangan viloyati: Pop, Kosonsoy, Chortoq, Chust, Namangan, Yangiqo‘rg‘on tumanlarida;
- Farg‘ona viloyati: So‘x, Shohimardon, Farg‘ona, Beshariq tumanlarida;
- Andijon viloyati: Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlarida va Xonabod shahrida sel-suv toshqin hodisalari yuzaga kelishi mumkin.
Yomg‘ir suvlari to‘planishi mumkin
«O‘zgidromet» ma’lumotiga ko‘ra, respublikaning ayrim hududlarida yomg‘ir suvlari to‘planishi ehtimoli bor.
Bu ayrim joylarda hududlarni suv bosishiga olib kelishi mumkin. Tog‘li hududlarda yashovchilar, dam oluvchilar va haydovchilarga xavfsizlik qoidalariga amal qilish tavsiya etildi.
Eslatib o‘tamiz, avvalroq issiqda xodimlarni himoya qilish uchun hokimliklarga ko‘rsatma yuborilgandi. Davlat mehnat inspeksiyasi soat 10:00 dan 17:00 gacha xavfli ishlarni vaqtincha to‘xtatish va moslashuvchan ish rejimini joriy etishni talab qildi.
