Xiaomi smartfon orqali boshqariladigan 621 litrli Mijia Side-by-Side nomli muzlatgich chiqardi. Bu haqda Notebookcheck nashri xabar bermoqda.
Yangi model Germaniyada dastlabki xaridorlarga 800 yevrodan taklif etilmoqda. Uning tavsiya qilingan chakana narxi esa 850 yevro etib belgilangan.
Muzlatgichning o‘lchamlari 910 × 715 × 1770 millimetrni tashkil etadi. Umumiy hajmning 385 litri sovitish kamerasi, 236 litri esa muzlatish bo‘limiga ajratilgan. Qurilma Yevropaning E energiya samaradorligi sinfiga kiradi va ishlab chiqaruvchi ma’lumotiga ko‘ra, yiliga 342 kilovatt-soat elektr energiyasi sarflaydi.
Ichki haroratni bir xil darajada ushlab turish uchun ko‘p oqimli havo aylanish tizimi qo‘llanilgan. Sovuq havo barcha bo‘limlarga teng taqsimlanadi, foydalanuvchilar esa ayrim bo‘limlardagi haroratni alohida sozlashi mumkin.
Muzlatish kamerasi bir sutkada 14 kilogrammgacha mahsulotni muzlatish imkoniyatiga ega. Xiaomi qurilma ishlayotgan paytda shovqin darajasi 35 desibeldan oshmasligini ma’lum qilgan. Bu ko‘rsatkich past ovozdagi suhbat bilan taqqoslanadi.
Mijia Side-by-Side ichki muz tayyorlash tizimi bilan jihozlangan, biroq uning eshigida tashqi dispenser mavjud emas. Haroratni sensorli panel, Xiaomi Home mobil ilovasi yoki ovozli buyruqlar orqali boshqarish mumkin. Muzlatgich eshiklari 120 darajagacha ochiladi.
Avvalroq «Kursiv» Xiaomi Skynomad qanday elektr yurish zaxirasini olishi haqida yozgan edi.
