1-avgustdan O‘zbekistonda nimalar o‘zgaradi

Kursiv Uzbekistan 1-avgustdan O‘zbekistonda yuz beradigan o‘zgarishlar haqida batafsil ma’lumotlarni bir joyga jamladi.

Ushbu maqolada siz quyidagilar bilan tanishishingiz mumkin:

• 1-avgustdan eskirgan avtomobilni topshirganda avtokredit foizi qoplanadi
• 1-avgustdan poytaxt va uning atrofidagi issiqxonalarga gaz yetkazib berish to‘xtatiladi
• Tadbirkorga erkinlik: «Yagona davlat nazorati» mobil ilovasi ishga tushiriladi
• Xavfsizlik qoidabuzarliklari haqida xabar berganlar rag‘batlantiriladi
• 1-avgustdan soliq organlarining mijozlarga yo‘naltirilganlik indeksi joriy etiladi
• Fitosanitar nazorat tizimida jamoatchi inspektor faoliyati yo‘lga qo‘yiladi
• Qozog‘iston O‘zbekiston olmasiga taqiq joriy etadimi
• Mehnat nizolari bo‘yicha alohida sudyalar faoliyati yo‘lga qo‘yiladi
• Izmir va Toshkent o‘rtasida muntazam parvozlar yo‘lga qo‘yiladi

1-avgustdan eskirgan avtomobilni topshirganda avtokredit foizi qoplanadi

 1-avgustdan trade-in dasturi doirasida eskirgan transport vositalarini topshirgan jismoniy va yuridik shaxslarga yangi avtomobil xaridi uchun avtokredit foizining bir qismi qoplab beriladi.

Ekologik tadbirlar doirasida 2026-yil yakuniga qadar Toshkent shahri «qizil», «sariq» va «yashil» zonalariga ajratiladi, Surxondaryo va Sirdaryo viloyatlarida esa chang bo‘ronlariga qarshi «yashil devor»lar barpo etilishi rejalashtirilgan.

1-avgustdan poytaxt va uning atrofidagi issiqxonalarga gaz yetkazib berish to‘xtatiladi

Toshkent shahri va unga tutash hududlarda faoliyat yuritayotgan issiqxonalar uchun 1-avgustdan boshlab tabiiy gaz yetkazib berish to‘liq to‘xtatiladi. 

Shu bilan birga, 1-iyundan boshlab poytaxt va uning atrofidagi ayrim tumanlarda zararli yoqilg‘ilar bilan ishlaydigan yangi issiqxonalar tashkil etish ham taqiqlanadi.

Amaldagi issiqxonalarga nisbatan ham talablar keskin kuchaytiriladi. Xususan, suv resurslaridan foydalanganlik uchun soliq stavkalari sezilarli oshiriladi, atrof-muhitni ifloslantiruvchi yoqilg‘ilarni qo‘llagan xo‘jaliklar uchun esa kompensatsiya to‘lovlari bir necha barobar ko‘paytiriladi. Bundan tashqari, ularga ajratiladigan subsidiyalar va yangi kreditlar hajmi qisqartiriladi.

Tadbirkorga erkinlik: «Yagona davlat nazorati» mobil ilovasi ishga tushiriladi

1-avgustdan boshlab esa davlat organlari va huquqni muhofaza qiluvchi tuzilmalar vakillari hamda tadbirkorlar o‘rtasidagi nazorat tadbiriga kirmaydigan muloqotlar «Yagona davlat nazorati» tizimida qayd etib boriladi. Barcha tekshiruvlar, jumladan jinoyat ishlari doirasidagi tekshiruvlar ham tizimda ro‘yxatdan o‘tkaziladi va «Biznes himoya» QR-kodi joriy etiladi.

Bundan tashqari, tekshiruv huquqiga ega bo‘lmagan yoki rejalashtirilmagan nazoratchi tomonidan tadbirkorlik faoliyatiga aralashuv holatlari real vaqt rejimida tizim orqali xabardor qilinadi. Bu orqali noqonuniy aralashuvlarning oldini olish ko‘zda tutilmoqda.

Xavfsizlik qoidabuzarliklari haqida xabar berganlar rag‘batlantiriladi

O‘zbekistonda sanoat, radiatsiya va yadro xavfsizligi qoidalari buzilishi haqida xabar bergan fuqarolarni rag‘batlantirish tizimi joriy etilmoqda.

2026-yil 1-avgustdan boshlab xavfli ishlab chiqarish obyektlari va texnik qurilmalardan foydalanishda aniqlangan huquqbuzarliklar haqida Sanoat, radiatsiya va yadro xavfsizligi qo‘mitasiga foto va (yoki) videomateriallar orqali xabar berish tizimi yo‘lga qo‘yiladi. Mazkur tartib orqali murojaat qilgan shaxslarni rag‘batlantirish ham nazarda tutilgan.

Qaror bilan tasdiqlangan nizomga muvofiq, taqdim etiladigan materiallarda huquqbuzarlikning mohiyati, sodir etilgan manzil (geolokatsiya), sana va vaqt aniq ko‘rsatilgan bo‘lishi shart. Bu talablar kelib tushgan ma’lumotlarni tezkor va aniq ko‘rib chiqish imkonini beradi.

1-avgustdan soliq organlarining mijozlarga yo‘naltirilganlik indeksi joriy etiladi

1-avgustdan soliq organlarining mijozlarga yo‘naltirilganlik indeksi joriy etiladi. Bu prezidentning soliq organlari faoliyatini takomillashtirishga oid farmonida keltirilgan.

Ushbu indeks orqali soliq to‘lovchilar xizmatlar sifati, qulayligi va soliq majburiyatlarini bajarishga ketadigan vaqtni baholashi mumkin bo‘ladi.

Shuningdek, 2030-yilgacha Jahon bankining «Business ready» reytingida soliq yo‘nalishi bo‘yicha birinchi darajaga chiqish maqsad qilingan.

Fitosanitar nazorat tizimida jamoatchi inspektor faoliyati yo‘lga qo‘yiladi

O‘zbekistonda meva-sabzavot va oziq-ovqat eksportini soddalashtirish hamda fitosanitar nazoratni takomillashtirish uchun tizimda jamoatchi inspektor faoliyati yo‘lga qo‘yiladi. 

Prezidentning «Fitosanitariya tartib-taomillarini soddalashtirish hamda meva-sabzavot va oziq-ovqat mahsulotlarini eksport qilish jarayonlarini takomillashtirishga doir qo‘shimcha chora-tadbirlar to‘g‘risida»gi qarori qabul qilindi.

1-avgustdan boshlab karantindagi mahsulotlar fitosanitar nazoratida xavflarni boshqarishga asoslangan tanlab olishning avtomatlashtirilgan mexanizmi joriy etiladi. Mazkur tizim «E-Fitouz» elektron portali orqali shakllantiriladi va Bojxona qo‘mitasining «Yagona darcha» axborot tizimi bilan to‘g‘ridan to‘g‘ri integratsiya qilinadi.

Qozog‘iston O‘zbekiston olmasiga taqiq joriy etadimi

Qozog‘iston olma importini vaqtincha taqiqlash loyihasini ko‘rib chiqmoqda. Tegishli buyruq loyihasi Qishloq xo‘jaligi vazirligi tomonidan Ochiq normativ-huquqiy hujjatlar portalida jamoatchilik muhokamasiga qo‘yilgan.

Hujjatga ko‘ra, cheklov 2026-yil 1-avgustdan 31-dekabrgacha amal qilishi mumkin. Taqiq olmani avtomobil, temiryo‘l va suv transporti orqali olib kirishga nisbatan qo‘llanadi. U Yevroosiyo iqtisodiy ittifoqi davlatlari hamda uchinchi mamlakatlardan import qilinadigan mahsulotlarga taalluqli bo‘ladi.

Mehnat nizolari bo‘yicha alohida sudyalar faoliyati yo‘lga qo‘yiladi

O‘zbekistonda mehnat nizolarini ko‘rib chiqishga ixtisoslashgan sudyalar korpusi tashkil etiladi.

Qarorga ko‘ra, 2026-yil 1-avgustdan boshlab fuqarolik ishlari bo‘yicha sudlarning amaldagi shtat birliklari doirasida mehnat nizolarini ko‘rib chiqishga ixtisoslashgan sudyalar faoliyati yo‘lga qo‘yiladi.

Yangi tizimga ko‘ra:

• Oliy sudning Fuqarolik ishlari bo‘yicha sudlov hay’atida 4 nafar;
• Qoraqalpog‘iston Respublikasi sudi, viloyatlar va Toshkent shahar sudlarida 3 nafardan ixtisoslashgan sudya faoliyat yuritadi.

Shuningdek, Nukus, Buxoro, Jizzax, Qarshi, Karmana, Namangan, Termiz, Ohangaron, Farg‘ona va Urganch tumanlararo sudlarida 2 nafardan, Samarqand shahar, Kattaqo‘rg‘on, O‘rta Сhirchiq, Yangiyo‘l hamda Toshkent shahrining Mirzo Ulug‘bek, Mirobod, Shayxontohur, Uchtepa va Yakkasaroy tumanlararo sudlarida ham belgilangan miqdorda ixtisoslashgan sudyalar ish olib boradi.

Izmir va Toshkent o‘rtasida muntazam parvozlar yo‘lga qo‘yiladi

Turkiyaning SunExpress aviakompaniyasi 2026-yil 1-avgustdan Izmir – Toshkent – Izmir yo‘nalishida muntazam parvozlarni yo‘lga qo‘yadi. Reyslar haftasiga to‘rt marta amalga oshiriladi.

Yangi yo‘nalishda 189 nafar yo‘lovchiga mo‘ljallangan Boeing 737-800 samolyotlari qatnaydi. Bu Toshkent va Izmir o‘rtasidagi ilk to‘g‘ridan to‘g‘ri muntazam aviaqatnov bo‘ladi.

Avvalroq «Kursiv» nashri 1-iyundan O‘zbekistonda nimalar o‘zgarishi haqida yozgandi.