Boeing: Markaziy Osiyo jahon aviatsiyasida yuksalib bormoqda

Aviatsiya markazlariga davlat investitsiyalari va milliy aviakompaniyalarni rivojlantirish Markaziy Osiyoning jahon aviatsiyasidagi rolini oshiradi, deb prognoz qilmoqda Boeing o‘zining 2026-2045-yillar uchun Commercial Market Outlook hisobotida.

Yevroosiyoda yo‘lovchi tashish 2045-yilgacha yiliga o‘rtacha 2,8 foizga oshadi, aviakompaniyalarga 8,59 mingta yangi samolyot kerak bo‘ladi, havo kemalari parki esa 10,82 ming donaga yetadi.

Boeing, shuningdek, Sharqiy Yevropa, Turkiya va Markaziy Osiyo mamlakatlarida aviatsiya bozorining o‘sishi aholi daromadlarining o‘sishini, arzon aviakompaniyalarning rivojlanishini va yo‘nalishlar tarmog‘ining kengayishini qo‘llab-quvvatlashini ta’kidlaydi.

Jahon yo‘lovchi tashish hajmi 2045-yilga borib ikki baravarga oshadi

Boeing kelgusi 20 yil ichida jahon yo‘lovchi tashish hajmi ikki baravar ko‘payishini kutmoqda. 2045-yilgacha aviatashuvchilar 43,6 mingta yangi tijorat samolyotlarini sotib oladi. Yangi samolyotlarning yarmi aviaparkni kengaytirish uchun emas, balki eskirgan laynerlarni almashtirish uchun sotib olinadi.

Loukosterlar an’anaviy aviakompaniyalarga qaraganda tezroq o‘sadi

Budjet aviakompaniyalari parki yiliga o‘rtacha 3,9 foizga, an’anaviy aviatashuvchilarniki esa 2,6 foizga oshadi.

O‘zbekistonda nima bor

IATA ma’lumotlariga ko‘ra, 2025-yilda O‘zbekistonda yo‘lovchilar oqimi qariyb 17 foizga oshib, 12,5 million kishini tashkil etdi.

Eslatib o‘tamiz, avvalroq IATA 2026-yil aprel oyida aviatsiya bozorida yo‘lovchi tashish hajmi 3,5 foizga kamayganini ma’lum qilgandi. Hisobotga ko‘ra, yo‘lovchi tashishga bo‘lgan global talab o‘tgan yilning shu davriga nisbatan 3,4 foizga kamaygan, yuk tashish hajmi esa 4 foizga oshgan.