Toshkentda yer o‘pirildi, UzAuto Motors Cobalt va Damas uchun chegirma e’lon qildi — 3-avgust kuni e’lon qilingan yangiliklar
Toshkentda yer o‘pirildi, UzAuto Motors Cobalt va Damas uchun chegirma e’lon qildi — 3-avgust kuni e’lon qilingan yangiliklar Kursiv Uzbekistan dayjestida.
UzAuto Motors Cobalt va Damas uchun chegirma e’lon qildi
Chevrolet O‘zbekiston Mustaqilligining 35 yilligi hamda UzAuto Motors kompaniyasining 30 yilligi munosabati bilan Captiva Cobalt va Damas avtomobillari uchun maxsus «Yil aksiyasi»ni boshladi. Bu haqda kompaniya matbuot xizmati ma’lum qildi.
Mazkur aksiya 3-avgustdan kuchga kirdi. Uning doirasida Chevrolet Captiva avtomobiliga 45 mln so‘mgacha, Cobalt MCM modeliga 15 mln so‘mgacha chegirma taqdim etiladi. Damas avtomobilining narxi esa 15 mln so‘mga pasaytiriladi.
Toshkentda 600 mln so‘mlik kontrafakt dorilar topildi
Toshkent shahri va Toshkent viloyatidagi uchta xonadonda Rossiyadan noqonuniy olib kelingan, qiymati qariyb 600 mln so‘mga baholangan 1330 quti kontrafakt dori vositalari aniqlandi. Bu haqda Davlat xavfsizlik xizmati ma’lum qildi.
DXX hamda Bojxona qo‘mitasi xodimlari hamkorligida o‘tkazilgan tezkor tadbir davomida poytaxtning Yangihayot tumanida yashovchi, 1963-yilda tug‘ilgan fuqaro va uning ikki farzandiga aloqador manzillar ko‘zdan kechirilgan.
Quyosh panellari uchun 330,8 mlrd so‘m subsidiya berildi
O‘zbekistonda 2026-yilning yanvar–iyun oylarida «Quyoshli xonadon» dasturi doirasida 68,6 ming nafar jismoniy shaxsga 330,8 mlrd so‘mdan ortiq subsidiya to‘landi. Bu haqda Soliq qo‘mitasi ma’lum qildi.
Subsidiya xonadonlarda ishlab chiqarilib, umumiy elektr tarmog‘iga uzatilgan quyosh energiyasi uchun davlat budjetidan ajratilgan. Yarim yil davomida dastur ishtirokchilarining elektr tarmog‘iga uzatgan energiyasi bo‘yicha 330,8 mln birlik ijobiy tafovut qayd etilgan. Iyun oyining o‘zida esa 61,1 ming nafar foydalanuvchiga 100,7 mlrd so‘m subsidiya to‘langan.
Olmazordagi yer o‘pirilishida bir kishi jabrlandi — hokimlik
Toshkentning Olmazor tumani Orzu massivi, 3-uy manzilida joylashgan qurilish obyektida yer o‘pirilishi yuz berdi. Hodisa oqibatida bir nafar fuqaro jabrlangani aniqlandi, deya xabar bermoqda Toshkent shahar hokimligi.
Hokimlik ma’lumotiga ko‘ra, dastlab hodisa oqibatida jabrlanganlar yoki tibbiy yordam so‘rab murojaat qilganlar qayd etilmagani bildirilgan. Keyinchalik ma’lumotlar yangilanib, bir kishi jarohat olgani ma’lum bo‘ldi.
Misrda 5,6 magnitudali zilzila sodir bo‘ldi
Misrning Suvaysh shahri yaqinida 5,6 magnitudali zilzila qayd etildi. Hozircha qurbonlar yoki vayronagarchiliklar haqida ma’lumot kelib tushmagan, deya xabar berdi Reuters nashri
Misr Milliy Astronomiya va Geofizika ilmiy-tadqiqot instituti ma’lumotiga ko‘ra, zilzila 3-avgust kuni mahalliy vaqt bilan soat 03:00 dan ko‘p o‘tmay, Suvaysh shahridan 38 kilometr shimolda sodir bo‘lgan.
Vashingtondagi yong‘inlardan jabrlanganlar orasida o‘zbekistonliklar yo‘q
AQShning Vashington shtatida davom etayotgan yirik o‘rmon yong‘inlaridan jabrlanganlar orasida O‘zbekiston fuqarolari yo‘q. Bu haqda O‘zbekistonning Sietl shahridagi Bosh konsulxonasi ma’lum qildi, deya xabar berdi «Dunyo» axborot agentligi.
Ma’lum qilinishicha, yong‘inlar 1-avgust kuni Vashington shtatining sharqiy qismida boshlanib, qisqa fursatda 100 ming gektardan ortiq maydonga tarqalgan. Kuchli shamol va qurg‘oqchilik sabab olov tez kengaygan.
Toshkentdagi Kichik halqa yo‘lida harakatlanish vaqti 45 foizga qisqardi
Toshkentdagi Kichik halqa avtomobil yo‘lining 1,7 kilometrlik qismida «Yashil to‘lqin» tizimi ishga tushirildi. Bu haqda Toshkent shahrida Yo‘l harakatini tashkil etish markazi xabar berdi.
Unga ko‘ra, navbatdagi bosqichda Kichik halqa avtomobil yo‘lining Bog‘ibuston ko‘chasi bilan kesishmasidan Chilonzor metro bekatigacha bo‘lgan 1,7 kilometrlik yo‘nalishdagi 5 ta svetofor o‘zaro sinxronlashtirildi.
AQSh ayrim davlat fuqarolaridan viza uchun 20 ming dollar garov talab qiladi
AQSh Davlat departamenti B-1 va B-2 turidagi biznes hamda turistik vizalar bo‘yicha garov dasturini doimiy qilishni rejalashtirmoqda. Reuters yozishicha, 50 ta davlat fuqarolaridan AQSh vizasini olish uchun $20 minggacha garov qo‘yish talab qilinishi mumkin. O‘zbekiston ushbu ro‘yxatga kiritilmagan.
Avval sinov tariqasida joriy qilingan dasturda garov miqdori $5 ming, $10 ming yoki $15 ming bo‘lishi mumkin edi.
Har bir mavjudotning qadri bor — Mirziyoyeva hayvonlarga shafqatsizlik uchun jazo kuchaytirilganini eslatdi
Prezident administratsiyasi rahbari Saida Mirziyoyeva hayvonlarga shafqatsiz munosabatda bo‘lganlarga nisbatan jazo choralari kuchaytirilganini ma’lum qildi. Uning ta’kidlashicha, bu normalar faqat aybdorlarni jazolash emas, balki jamiyatda zo‘ravonlikka murosasiz munosabatni shakllantirishga ham xizmat qiladi.
Hayvonlarga shafqatsiz munosabatda bo‘lganlarga nisbatan yanada keskin jazo choralarini nazarda tutuvchi qonunchilik normalari joriy yil 28-iyundan kuchga kirgan.
O‘zbekistonlik tibbiyot xodimlari Chexiyada ishga joylashishi mumkin
O‘zbekiston va Chexiya o‘rtasida tibbiyot xodimlari hamda hamshiralarni qonuniy ishga joylashtirish bo‘yicha hamkorlik kengaytirilishi mumkin. Bu masala O‘zbekistonning Chexiyadagi elchixonasida «ZYLORA» kompaniyasi vakili bilan o‘tkazilgan uchrashuvda muhokama qilindi, deya xabar berdi «Dunyo».
Muloqotda O‘zbekiston Migratsiya agentligi va Chexiya Sog‘liqni saqlash vazirligi o‘rtasida tartibga solingan mehnat migratsiyasi asosida tibbiyot xodimlari va hamshiralarni ishga jalb etish masalalari ko‘rib chiqildi.
