Samsung Galaxy S26 yoki Vivo X300 E bir xil yuqori toifadagi smartfonlar segmentida ishtirok etsa-da, xaridorga mutlaqo boshqa yondashuvni taklif qiladi. Gizmochina nashri ikki modelni taqqosladi.
ivo katta batareya, tez quvvatlash, yuqori yangilanish chastotasiga ega ekran va kuchli telefoto kameraga urg‘u bergan. Samsung esa ixcham korpus, kuchliroq protsessor, uzoq muddatli dasturiy qo‘llab-quvvatlash va Galaxy ekotizimini asosiy ustunlik sifatida taklif etadi.
Texnik imkoniyatlar
Vivo X300 E 6,59 dyuymli AMOLED ekran bilan jihozlangan. Uning aniqligi 2750 × 1260 pikselni tashkil etadi, yangilanish chastotasi esa 144 Hzgacha yetadi. Rasmiy ma’lumotlarda 60, 90, 120 va 144 Hz rejimlari qo‘llab-quvvatlanishi ko‘rsatilgan. GizmoChina ekran yorqinligi ayrim sharoitlarda 5 ming nitgacha yetishini qayd etadi.
Galaxy S26 kichikroq — 6,3 dyuymli Dynamic AMOLED 2X displeyga ega. Uning yangilanish chastotasi 1 dan 120 Hzgacha avtomatik o‘zgaradi. Ekranning maksimal yorqinligi 2 600 nitni tashkil qiladi. Vivo yuqoriroq yangilanish chastotasi va kattaroq ekran taklif qilsa, Samsung’ning LTPO texnologiyasi chastotani kontentga qarab pasaytirib, energiya sarfini kamaytirishga yordam beradi.
Unumdorlik masalasida vaziyat aksincha. Vivo X300 E 3 nanometrli Snapdragon 8 Gen 5 va Adreno 829 grafik protsessori bilan ishlaydi. Qurilmada 12 GB tezkor xotira hamda 256 yoki 512 GB UFS 4.1 doimiy xotira mavjud.
Galaxy S26 esa sotiladigan bozorga qarab Snapdragon 8 Elite Gen 5 for Galaxy yoki Samsung’ning 2 nanometrli Exynos 2600 protsessoriga ega. Har ikkisi ham yuqori toifadagi chiplar bo‘lib, ayniqsa maksimal unumdorlik va murakkab mobil o‘yinlarda Vivo’dagi oddiy Snapdragon 8 Gen 5’dan kuchliroq imkoniyat taqdim etadi. Galaxy S26 ham 12 GB tezkor xotira bilan taklif qilinadi.
Shuning uchun faqat protsessor quvvatiga qaralsa, Galaxy S26 ustunroq. Ammo Vivo’dagi 144 Hz ekran va katta batareya uzoq davom etadigan o‘yin seanslari uchun o‘ziga xos afzallik beradi.
Batareya
Ikki smartfon o‘rtasidagi eng katta farq aynan batareyada ko‘rinadi. Vivo X300 E 7 200 mA/soat sig‘imli batareyaga ega. Bunday ko‘rsatkich hatto zamonaviy flagmanlar orasida ham katta hisoblanadi. Smartfon 90 Vt quvvatli simli tezkor quvvatlashni qo‘llab-quvvatlaydi. Shuningdek, OTG orqali boshqa qurilmalarni quvvatlash imkoniyati mavjud.
Galaxy S26’da esa 4 300 mA/soatlik batareya o‘rnatilgan. Samsung 25 Vt simli quvvatlashni qo‘llaydi va ishlab chiqaruvchining hisob-kitobiga ko‘ra, mos adapter yordamida batareyani taxminan 30 daqiqada 55 foizgacha to‘ldirish mumkin. Galaxy S26’ning muhim afzalligi — simsiz quvvatlash va Wireless PowerShare orqali boshqa moslamalarni simsiz quvvatlantirish imkoniyati.
Raqamlarga qaraganda, avtonom ishlash va quvvatlash tezligi Vivo X300 E’ning eng kuchli jihatlaridan biri. Uning batareyasi Galaxy S26’nikidan qariyb 67 foiz katta. Albatta, bu Vivo real sharoitda aynan 67 foiz uzoq ishlaydi degani emas: ekran o‘lchami, protsessor, dasturiy optimallashtirish va foydalanish rejimi ham natijaga ta’sir qiladi.
Shunday bo‘lsa-da, smartfonni tez-tez quvvatlashni istamaydigan foydalanuvchi uchun Vivo ancha jozibador ko‘rinadi. Samsung esa kichikroq batareya evaziga ancha ixcham va yengil korpusni saqlab qolgan.
Kamera tizimi
Asosiy kamerada ikkala smartfon ham 50 MP sensordan foydalanadi. Ammo qolgan modullarda yondashuv keskin farqlanadi.
Vivo X300 E’da optik barqarorlashtirishga ega 50 MP asosiy kamera, yana 50 MP ZEISS telefoto kamerasi va 8 MP ultra keng burchakli modul o‘rnatilgan. Asosiy va telefoto kameralar OIS tizimiga ega, telefoto modul esa 100 karra raqamli zumgacha ishlashi mumkin. Old kameraning aniqligi ham 50 MP.
Galaxy S26’da 50 MP asosiy kamera 12 MP ultra keng burchakli va 3 karra optik yaqinlashtirish imkoniyatiga ega 10 MP telefoto kamera bilan birlashtirilgan. Old kamerasi 12 MP.
Faqat sensorlarning megapikseliga qarab baholansa, Vivo ancha kuchli ko‘rinadi. Ayniqsa, 50 MP telefoto va 50 MP old kamera surat tafsilotlarini saqlash bo‘yicha qo‘shimcha imkoniyat yaratadi. Lekin megapiksel sonining o‘zi yakuniy surat sifatini belgilamaydi. Tasvirni qayta ishlash algoritmlari, sensor hajmi, optika va HDR ishlashi ham katta ahamiyatga ega.
Video bo‘yicha esa Galaxy S26’ning ustunligi yaqqolroq. Vivo X300 E rasmiy ma’lumotlarga ko‘ra 4K videoni qo‘llab-quvvatlaydi, Galaxy S26 esa 8K formatda soniyasiga 30 kadr va 4K formatda soniyasiga 60 kadr yozishi mumkin.
Demak, zum va yuqori aniqlikdagi selfiga ko‘proq e’tibor beradigan foydalanuvchi uchun Vivo qiziqroq. Video suratga olish, barqaror qayta ishlash va Samsung’ning kamera algoritmlarini afzal ko‘radiganlar uchun Galaxy S26 kuchliroq tanlov bo‘lib qoladi.
Foydalanish qulayliklari
Vivo X300 E’ning katta batareyasi uning o‘lchamlariga ham ta’sir qilgan. Smartfonning uzunligi 157,5 mm, kengligi 74,3 mm, vazni rangiga qarab qariyb 200–203 grammni tashkil qiladi. Qurilma IP68 va IP69 standartlari bo‘yicha suv hamda changdan himoyalangan. Bundan tashqari, infraqizil port, NFC, Wi-Fi 7, Bluetooth 5.4 va ultratovushli barmoq izi skaneri mavjud.
Galaxy S26 esa ixcham flagman qidiradigan foydalanuvchilar uchun ancha qulay. Uning o‘lchamlari 149,6 × 71,7 × 7,2 mm, vazni esa atigi 167 gramm. Smartfon ham IP68 himoyasiga ega. Wi-Fi 7 va Samsung’ning boshqa Galaxy qurilmalari bilan integratsiyasi uning kundalik foydalanishdagi kuchli tomonlaridan hisoblanadi.
Samsung’ning yana bir muhim ustunligi dasturiy ta’minotda namoyon bo‘ladi. Galaxy S26 Android 16 asosidagi One UI 8.5 bilan chiqarilgan va kompaniyaning uzoq muddatli yangilash siyosatidan foydalanadi. Galaxy ekotizimi, DeX va boshqa Samsung qurilmalari bilan integratsiya ham smartfonni faqat telefon emas, balki ish qurilmasi sifatida ishlatadigan foydalanuvchilar uchun ahamiyatli.
Vivo X300 E ham Android 16 asosidagi OriginOS 6 bilan ishlaydi. Biroq bu model hozircha asosan Xitoy bozori uchun chiqarilgan. Shu sababli O‘zbekiston yoki boshqa davlatdan xarid qiladigan foydalanuvchi mobil tarmoqlar, tizim tili, kafolat va global servislar bilan bog‘liq jihatlarni oldindan tekshirishi kerak.
Eslatib o‘tamiz, Kursiv Uzbekistan nashri Samsung Galaxy S27 Pro va Galaxy S27 Ultra modellarida o‘yin qulayliklari oshishi haqida yozgan edi.
