«Manchester Siti» futbolchisi Osiyo jamoasiga o‘tdi
«Manchester Siti» yarim himoyachisi Tijjani Reynders faoliyatini Saudiya Arabistonining «Al-Qodisiya» klubida davom ettiradi. Tomonlar transfer bo‘yicha kelishuvga erishgan. Bu haqda transferlar bo‘yicha insayder Fabrizio Romano ma’lum qildi.
Transfer summasi 60 mln yevroga yaqin
Manbalarga ko‘ra, «Al-Qodisiya» 28 yoshli futbolchi uchun «Manchester Siti»ga taxminan 60 mln yevro to‘laydi. Ayrim ma’lumotlarda yakuniy summa 61 mln yevroga yaqin bo‘lishi aytilmoqda.
Reynders «Manchester Siti»ga 2025-yilda «Milan»dan o‘tgan edi. U Angliya klubidagi bir mavsumidan so‘ng Saudiya Arabistoniga yo‘l olmoqda. O‘tgan mavsumda niderlandiyalik futbolchi barcha turnirlarda 50 ga yaqin uchrashuvda maydonga tushib, 7 ta gol urgan va 8 ta golli uzatmani amalga oshirgan.
«Al-Qodisiya» yana bir yulduz futbolchini tarkibiga qo‘shadi
Reynders Saudiya klubida hujumchilar Xulian Kinyones va Matteo Retegi bilan bir jamoada o‘ynaydi.
«Al-Qodisiya»ning Reyndersga qiziqishi Saudiya klublarining Yevropaning yetakchi chempionatlarida to‘p tepgan futbolchilarni tarkibiga jalb qilish siyosati davom etayotganini ko‘rsatadi.
Reyndersning «Manchester Siti» bilan shartnomasi 2030-yilgacha mo‘ljallangan edi. Biroq klubning yarim himoyadagi tarkibini qayta shakllantirayotgani sabab futbolchi bilan xayrlashishga qaror qilingan.
Avvalroq O‘zbekiston milliy terma jamoasi va Termizning «Surxon» klubi himoyachisi Behruzjon Karimov faoliyatini Shveysariyaning «Lugano» jamoasida davom ettirishi haqida xabar berilgandi.
