iQOO kompaniyasi 15 000 mA·soat sig‘imli batareya va 240 Hz yangilanish tezligiga ega ekran bilan jihozlangan X konsept smartfonini namoyish qildi. Qurilma hozircha tajriba loyihasi bo‘lib, uning seriyali ishlab chiqarilishi rejalashtirilmagan.
15 000 mA·soat batareya va 240 Hz ekran
Gizmochina ma’lumotiga ko‘ra, iQOO X «Blue Ice Battery» deb nomlangan 15 000 mA·soat sig‘imli qattiq holatdagi batareya bilan jihozlangan. Hozirda bunday sig‘imdagi qattiq holatdagi akkumulyatorlar ommaviy sotuvdagi smartfonlarda qo‘llanilmaydi.
Konsept 7 dyuymli LTPO 6.0 displeyga ega. Ekran 2K’dan yuqori aniqlik, 240 Hz yangilanish va 4 800 Hz sensor so‘rovi chastotasini qo‘llab-quvvatlaydi. Shuningdek, displeyning katta qismini qamrab oluvchi ultratovushli barmoq izi skaneri hamda ekranning turli qismlaridagi yangilanish chastotasini alohida boshqaruvchi texnologiya ko‘zda tutilgan.
Hozircha mavjud bo‘lmagan Snapdragon chipi
iQOO X uchun Snapdragon 8 Elite Gen10 Pro protsessori va kompaniyaning QX o‘yin chipi ko‘rsatilgan. Biroq Snapdragon 8 Elite Gen10 Pro hozircha mavjud tijoriy platforma emas – Qualcomm’ning yaqin avlod flagmanlari uchun Snapdragon 8 Elite Gen 6 Pro tayyorlanmoqda. Shu sabab iQOO X yaqin kelajakda sotuvga chiqadigan modeldan ko‘ra kompaniyaning kelajak texnologiyalari haqidagi tasavvurini namoyish etuvchi konsept hisoblanadi.
Kamera tizimida 200 MP Sony asosiy sensori, Samsung’ning 200 MP periskop telekamerasi va 50 MP ultra keng burchakli kamerasi nazarda tutilgan. Tadbirda smartfonning jismoniy prototiplari ham namoyish etilgan.
Konsept uchun narxlar ham ko‘rsatildi
iQOO qurilma hozircha konsept bo‘lishiga qaramay, uning taxminiy narxlarini ham ko‘rsatgan. 12/512 GB versiya 6 999 yuan — qariyb $1 ming, 16/512 GB varianti 7 399 yuan — taxminan $1,1 ming deb baholangan.
16 GB tezkor va 1 TB ichki xotirali konfiguratsiya 7 799 yuan — qariyb $1,2 ming, eng yuqori 24 GB/1 TB versiya esa 8 599 yuan yoki taxminan $1,3 ming turishi ko‘rsatilgan. Konsept qora va oq ranglarda namoyish etilgan.
Avvalroq Kursiv Uzbekistan iQOO 15 Ultra smartfoni rasman taqdim etilgani haqida xabar bergan edi. Model Snapdragon 8 Elite Gen 5 protsessori, 7 400 mA·soat batareya va 144 Gts ekran bilan jihozlangan.
