O‘zbekistonda Chevrolet Captiva avtomobillarini maxsus aksiya doirasida 264,9 mln so‘mdan xarid qilish mumkin. Taklif bo‘yicha chegirma miqdori komplektatsiyaga qarab 45 mln so‘mgacha yetadi.
Chevrolet rasmiy dilerlik markazlari va UzAuto Motors bilan hamkorlik qiluvchi ayrim banklar dam olish kunlari ham mijozlarga xizmat ko‘rsatadi. Shu sababli hafta davomida avtosalonga borishga ulgurmagan xaridorlar shanba va yakshanba kunlari ham dilerlik markazlariga murojaat qilishi mumkin.
Captiva narxi 264,9 mln so‘mdan boshlanadi
Maxsus taklif doirasida Chevrolet Captiva’ning chegirmadagi boshlang‘ich narxi 264,9 mln so‘mni tashkil etadi. Xaridor avtomobilning tanlangan versiyasiga qarab 45 mln so‘mgacha mablag‘ tejashi mumkin.
Aksiya 2026-yil 10-sentabrgacha, shu kunni ham qo‘shib hisoblaganda, amal qiladi.
Bunda muhim shart mavjud: maxsus narx avtomobil qiymatining 100 foizi bir yo‘la to‘langanda qo‘llanadi. Tijorat banklari orqali moliyalashtiriladigan xaridlarga mazkur aksiya shartlari tatbiq etilmaydi.
Dam olish kunlari faoliyat yuritadigan hamkor banklar va dilerlik markazlari bo‘yicha batafsil ma’lumotni Chevrolet rasmiy dilerlaridan olish mumkin.
Model haqida
Chevrolet Captiva O‘zbekiston bozorida oilaviy krossover sifatida taklif etiladi. Chevrolet’ning rasmiy ma’lumotlariga ko‘ra, model 1,5 litrli turbo dvigatel bilan jihozlangan bo‘lib, uning maksimal quvvati 149 ot kuchini tashkil etadi. Dvigatel CVT variator uzatmalar qutisi bilan ishlaydi.
Captiva’ning O‘zbekistonda LT1, LT2 va Premier komplektatsiyalari mavjud. Versiyaga qarab avtomobil besh yoki yetti o‘rindiqli salon bilan taklif qilinadi. Masalan, LT2 komplektatsiyasida 10,4 dyuymli sensorli multimedia ekrani, kruiz-nazorat, oltita xavfsizlik yostiqchasi va LED kunduzgi chiroqlar ko‘zda tutilgan.
Premier versiyasida esa 18 dyuymli g‘ildirak disklari, old parkovka datchiklari, LED faralar, shinalardagi bosimni nazorat qilish tizimi va 360 darajali kameralar tizimi mavjud. Shuningdek, ushbu komplektatsiyada tepaga ko‘tarilishda yordam beruvchi tizim va perforatsiyalangan sun’iy charm bilan qoplangan salon taklif etiladi.
Chevrolet’ning rasmiy saytida Captiva’ning aksiyasiz boshlang‘ich narxi hozirda 304,9 mln so‘m sifatida ko‘rsatilgan. Shu fon’da 264,9 mln so‘mlik maxsus taklif modelni odatiy boshlang‘ich narxdan sezilarli arzonroq xarid qilish imkonini beradi.
Chegirma uchun to‘lov shartiga e’tibor berish kerak
Aksiya doirasidagi narxdan foydalanishni rejalashtirayotgan xaridorlar avtomobilni bank krediti orqali xarid qilish va 100 foizlik to‘lov bilan sotib olish shartlarini bir-biridan ajratishi lozim.
UzAuto Motors taqdim etgan ma’lumotga ko‘ra, 45 mln so‘mgacha chegirma aynan avtomobil uchun 100 foiz to‘lov amalga oshirilganda amal qiladi. Tijorat banklari orqali amalga oshiriladigan xaridlar esa mazkur maxsus aksiya shartlariga kirmaydi.
Avvalroq «Kursiv» Chevrolet Cobalt avtomobiliga chegirma e’lon qilingani haqida yozgan edi.
