Xorazmga 4 mlrd dollar xorijiy investitsiya jalb qilindi

So‘nggi yillarda Xorazm viloyatiga $4 mlrd xorijiy investitsiya jalb qilinib, 10 mingta yangi quvvat ishga tushirildi. Bu haqda Shavkat Mirziyoyevning Xorazmdagi tadbirkorlar bilan ochiq muloqotida qayd etildi.

Bugungi kunda hudud iqtisodiyotining 72 foizini kichik biznes shakllantirmoqda, eksportdagi ulushi esa 81 foizga yetdi.

Xorazmda 31 ta sanoat zonasi tashkil etildi

Davlat rahbari so‘nggi yillarda Xorazmda tadbirkorlikni rivojlantirish uchun yangi sharoitlar yaratilganini ta’kidladi.

Viloyatda Hazorasp maxsus iqtisodiy zonasi hamda 31 ta sanoat zonasi tashkil etildi. Bu hududlarda yangi ishlab chiqarish loyihalarini amalga oshirish va tadbirkorlar faoliyatini kengaytirish uchun zarur infratuzilma shakllantirilmoqda.

Energiya ta’minotini yaxshilash maqsadida Tuproqqal’a va Yangiariqda umumiy quvvati 275 MVt bo‘lgan elektr stansiyalari barpo etildi. Ular hududdagi korxonalarni barqaror elektr energiyasi bilan ta’minlashga xizmat qilmoqda.

Kichik biznes eksportdagi ulush bo‘yicha yetakchiga aylandi

Bugungi kunda Xorazm iqtisodiyotining 72 foizi kichik biznes hissasiga to‘g‘ri kelmoqda.

Viloyat eksportida ham kichik biznesning ulushi yuqori bo‘lib, 81 foizga yetgan. Ushbu ko‘rsatkich bo‘yicha Xorazm O‘zbekiston hududlari orasida birinchi o‘rinni egallamoqda.

Prezident hududdagi tadbirkorlik faolligi va yangi loyihalar Xorazm iqtisodiyotining tarkibini sezilarli darajada o‘zgartirayotganini qayd etdi.

Aviareyslar soni olti baravardan ko‘proqqa oshdi

So‘nggi yillarda viloyatning transport imkoniyatlari ham sezilarli kengaydi.

Xorazmga amalga oshiriladigan haftalik aviareyslar soni 16 tadan 102 taga, temir yo‘l qatnovlari esa 8 tadan 41 taga ko‘paydi. Bundan tashqari, Toshkent – Xiva yo‘nalishida tezyurar poyezd qatnovi yo‘lga qo‘yildi. Uzunligi 35 km bo‘lgan yangi Urganch – Xiva avtomobil yo‘li ham ishga tushirilmoqda.

Transport infratuzilmasining kengayishi hududga sayyohlar oqimini oshirish va tadbirkorlar uchun logistika imkoniyatlarini yaxshilashga xizmat qilishi kutilmoqda.

Xorazmga 3 mln xorijiy sayyoh kelishi kutilmoqda

Turizm infratuzilmasini rivojlantirish doirasida Xivada 25 gektar maydonda Arda Xiva turistik majmuasi barpo etildi.

Shuningdek, tadbirkorlar tomonidan jami 7 ming o‘ringa ega 331 ta mehmonxona va mehmon uyi tashkil qilindi. Joriy yilda Xorazmga 3 mln xorijiy sayyoh kelishi kutilmoqda.

Kelgusida Xivada yana bir yirik loyiha — Sahro yulduzi turistik kompleksi bunyod etiladi. Majmua tarkibidan mehmonxona, savdo va ko‘ngilochar obyektlar o‘rin olishi rejalashtirilgan.

Avvalroq «Kursiv» O‘zbekistonda korxonalar investitsiyasi 5 yilda 3 baravar oshgani haqida yozgan edi.