AQSh Suriyani terrorizmni qo‘llab-quvvatlovchilar ro‘yxatidan chiqardi

AQSh Davlat departamenti Suriyani terrorizmni qo‘llab-quvvatlovchi davlatlar ro‘yxatidan chiqardi. Vashington, shuningdek, «Hay’at Tahrir ash-Shom» guruhiga nisbatan ayrim sanksiyalarni ham bekor qildi.

Qaror 24-avgust kuni e’lon qilindi. AQSh moliya vaziri Skott Bessentning ta’kidlashicha, bu qadam Suriyaga qo‘shimcha investitsiyalarni jalb qilish va mamlakatdagi siyosiy hamda iqtisodiy barqarorlikni mustahkamlashga yordam beradi.

Suriya jahon iqtisodiyotiga qaytishga umid qilmoqda

Suriya o‘tish davri hukumati tashqi ishlar vaziri Asad ash-Shayboniy AQSh qarorini «muhim bosqich» deb atadi. Uning so‘zlariga ko‘ra, Damashq mamlakatning xalqaro izolyatsiyasi oqibatlarini bartaraf qilish va shaffoflik hamda o‘zaro manfaatlarga asoslangan muhit yaratish ustida ishlashda davom etadi.

Suriya moliya vaziri Muhammad Barnia esa qarorni mamlakat diplomatiyasining «tarixiy muvaffaqiyati» deb baholadi. Uning fikricha, bu qaror Suriyaning jahon iqtisodiy va moliyaviy tizimiga integratsiyalashuvi, xorijiy investitsiyalar va zamonaviy texnologiyalarni jalb qilishi uchun yangi imkoniyatlar yaratadi.

AQShning Suriya bo‘yicha maxsus vakili Tom Barrak esa qarorni mamlakatning «izolyatsiyadan sheriklikka» o‘tishidagi muhim qadam deb atadi.

Vashington Damashq bilan munosabatlarni yumshatmoqda

AQShning Suriyaga nisbatan siyosati Bashar Asad rejimi 2024-yil oxirida ag‘darilganidan keyin sezilarli darajada o‘zgardi. Donald Tramp 2025-yil iyunida Suriyaga nisbatan avval joriy etilgan aksariyat sanksiyalarni bekor qilgan edi.

Endi Damashq Vashington tomonidan terrorizmni qo‘llab-quvvatlovchi davlat sifatida ham ko‘rilmaydi.

Shu bilan birga, Suriyaning Isroil bilan munosabatlari keskinligicha qolmoqda. Ikki davlat o‘rtasidagi vaziyatni yumshatish maqsadida 23-avgust kuni Iordaniyada muzokaralar boshlangan. Biroq bundan bir necha kun oldin Isroil Suriyaning shimoli-g‘arbidagi aerodromga havo zarbalari bergan.

Avvalroq Suriya sudi mamlakatning sobiq prezidenti Bashar Asadni insoniyatga qarshi jinoyatlar va harbiy jinoyatlarda aybdor deb topib, sirtdan o‘lim jazosiga hukm qilgandi.