Tramp Ontario ko‘lini «Amerika ko‘li» deb qayta nomladi
AQSh prezidenti Donald Tramp Ontario ko‘lini Amerika ko‘li – Lake America deb qayta nomlash to‘g‘risidagi farmonni imzoladi. Oq uy ma’lumotiga ko‘ra, qaror AQSh va Kanada o‘rtasidagi savdo munosabatlari keskinlashgan bir paytda qabul qilindi.
Jurnalistlar Trampdan ushbu qaror orqali Kanadaga qanday signal yubormoqchi ekanini so‘ragan. AQSh prezidenti bunga «Hech qanday» deya javob bergan.
Ontario ko‘li haqida
Ontario ko‘li Shimoliy Amerikadagi beshta Buyuk ko‘ldan biri bo‘lib, AQSh va Kanada chegarasida joylashgan. U Buyuk ko‘llarning eng sharqiy qismida joylashgan va maydoni jihatidan ular orasida eng kichigi hisoblanadi.
Ko‘lning umumiy maydoni qariyb 19 ming kvadrat kilometrni tashkil qiladi. Uning o‘rtacha chuqurligi 86 metr, eng chuqur nuqtasi esa qariyb 244 metrga yetadi.
Ko‘lning shimoliy qirg‘og‘i Kanada hududiga, janubiy qismi esa AQShning Nyu-York shtatiga tegishli. Ontario nomi Kanadaning aholisi eng ko‘p va iqtisodiy jihatdan yetakchi provinsiyalaridan biriga ham berilgan.
Xorijiy OAVning qayd etishicha, ko‘l ikki davlat o‘rtasida bo‘lingani sababli Tramp farmonining huquqiy kuchi faqat AQSh hududi va mamlakatning rasmiy hujjatlariga taalluqli bo‘lishi mumkin. Kanada hududida esa ko‘lning rasmiy nomi o‘zgarmaydi.
Qaror savdo mojarosi fonida qabul qilindi
Ontario ko‘lini qayta nomlash AQSh va Kanada o‘rtasidagi savdo ziddiyatlari kuchaygan va bojlar yuzasidan muzokaralar muvaffaqiyatsizlikka uchragan bir paytga to‘g‘ri keldi.
Tramp avvalroq Truth Social ijtimoiy tarmog‘ida AQSh Kanadaning Ontario provinsiyasi bilan faol biznes aloqalarini davom ettirishni rejalashtirmayotganini bildirgan edi. U shu sababli Ontario nomini o‘zgartirish kerakligini ham ta’kidlagan.
Kanada qarorga qarshi chiqdi
Kanada bosh vaziri Mark Karni Tramp qaroriga qat’iy qarshi chiqdi. U Ontario nomi ko‘lga bundan 400 yildan ko‘proq vaqt avval guron hindulari tomonidan berilganini eslatdi. Karni fikricha, kanadaliklar uchun ko‘l bundan keyin ham Ontario nomi bilan qoladi.
AQSh rasmiy hujjatlarida ko‘l «Amerika ko‘li» deb atalishi mumkin bo‘lsa-da, Kanada bu nomni tan olmasligini ma’lum qildi.
Tramp avval ham geografik nomni o‘zgartirgan
Bu Donald Trampning geografik obyekt nomini o‘zgartirishga qaratilgan birinchi qarori emas.
Avvalroq u AQSh rasmiy hujjatlarida Meksika ko‘rfazini «Amerika ko‘rfazi» deb atash bo‘yicha ko‘rsatma bergan edi. Ontario ko‘li bo‘yicha yangi qaror ham Tramp ma’muriyatining geografik nomlarni AQSh siyosiy yondashuviga mos ravishda o‘zgartirish siyosatining navbatdagi misoli bo‘ldi.
Avvalroq «Kursiv» AQShda favqulodda holat e’lon qilingani haqida yozgan edi.
