Yaponiyada 1,8 ming kishi 360 tonnalik tarixiy minorani qo‘lda ko‘chirdi
Yaponiyada 1 800 kishi Xirosaki qal’asining 360 tonnalik tarixiy minorasini qo‘lda ko‘chirishda ishtirok etdi. Buning uchun qadimiy yapon usuli – hikiya qo‘llanildi. Ushbu usulda bino maxsus roliklar ustiga o‘rnatilib, arqonlar yordamida butun holda siljitiladi.
Minora zilzila oqibatida zarar ko‘rgan qal’a devorini ta’mirlash ishlari sabab avvalroq tarixiy joyidan ko‘chirilgan edi. Endi u bosqichma-bosqich asl joyiga qaytarilmoqda.
Minora ikki bosqichda siljitildi
Ishtirokchilar 80 kishilik guruhlarga bo‘lindi. Ular navbat bilan platformaga ulangan arqonlarni tortib, minorani dam olish kunlari davomida ikki bosqichda ko‘chirdi.
Birinchi bosqichda minora 1,13 metrga, keyin esa yana 1,09 metrga siljitildi. Shu tariqa ikki kun ichida tarixiy bino jami 2,22 metrga ko‘chirildi.
Bunday usul binoni qismlarga ajratmasdan saqlab qolish imkonini beradi.
Hikiya usuli nima
Hikiya – Yaponiyada qadimdan qo‘llanilgan bino ko‘chirish usuli. Unda bino maxsus konstruksiya va roliklar ustiga joylashtiriladi, so‘ng arqonlar orqali asta-sekin kerakli nuqtaga tortiladi.
Bu texnologiyaning asosiy afzalligi tarixiy inshootni buzmasdan boshqa joyga siljitish mumkinligidadir. Xirosaki qal’asi minorasini ham aynan shu usul yordamida saqlab qolish maqsad qilingan.
1 800 o‘rin uchun 8 ming ariza tushgan
Tadbirda qatnashish istagida bo‘lganlar soni ajratilgan o‘rinlardan ancha ko‘p bo‘lgan.
1 800 ta joy uchun qariyb 8 ming kishi ariza topshirgan. Ular orasida nafaqat Yaponiyadan, balki Janubi-Sharqiy Osiyo, Yevropa va Shimoliy Amerikadan kelganlar ham bo‘lgan.
Bu loyiha tarixiy me’moriy merosni saqlash bilan birga, jamoatchilik ishtirokidagi katta tadbirga ham aylangan.
Xirosaki qal’asi 1611-yilda qurilgan
Xirosaki qal’asi Yaponiyada bugungi kungacha saqlanib qolgan 12 ta qadimiy qal’a minorasidan biri hisoblanadi. U Toxoku mintaqasidagi yagona shunday tarixiy obyekt sanaladi.
Qal’a dastlab 1611-yilda qurilgan. 1627-yilda chaqmoq urishi ortidan yong‘in sodir bo‘lib, inshootning bir qismi vayron bo‘lgan. Hozirgi minora esa 1810-yilga tegishli.
Qal’a 2033-yilgacha yopiq qolishi mumkin
Xirosaki qal’asi hozir mashhur bog‘ hududida joylashgan. Bu yerga har yili sakura gullashi mavsumida millionlab sayyohlar tashrif buyuradi.
Biroq katta rekonstruksiya ishlari davom etayotgani sabab minora tashrif buyuruvchilar uchun vaqtincha yopilgan. U taxminan 2033-yilgacha yopiq qolishi kutilmoqda.
Eslatib o‘tamiz, Kursiv Uzbekistan nashri Yaponiyaning Tokio bilan chegaradosh Tiba prefekturasida yomg‘irlar oqibatida kamida to‘rt kishi halok bo‘lgani haqida yozgan edi.
