Toyota Avstraliyada Toyota Land Cruiser 250 va Land Cruiser 300 yo‘ltanlamaslari uchun qo‘shimcha o‘g‘irlikka qarshi himoya tizimini taqdim etdi. Bu haqda Carcoops nashri xabar bermoqda.
Yangi elektron immobilayzer avtomobilning standart xavfsizlik tizimidan mustaqil ishlaydi va mashinani olib qochishni qiyinlashtirishga mo‘ljallangan.
Biroq bunday qo‘shimcha himoya arzon emas. Toyota yangi tizimni o‘rnatish bilan birga 1260 dollarga taklif qilmoqda.
Dvigatel maxsus breloksiz ishga tushmaydi
Yangi tizim avtomobilning zavod immobilayzeridan alohida ishlaydi. Agar qo‘shimcha tizimning elektron breloki avtomobil yaqinida bo‘lmasa, dvigatelni ishga tushirishning imkoni bo‘lmaydi.
Bu shuni anglatadiki, avtomobilni o‘g‘irlashga uringan shaxs faqat zavod xavfsizlik tizimini chetlab o‘tish bilan cheklanib qolmaydi. U qo‘shimcha immobilayzerni ham ishdan chiqarishi kerak bo‘ladi.
Toyota shu tariqa Land Cruiser’ning elektron himoyasini ikki bosqichli qilishni maqsad qilgan.
Signalizatsiya alohida batareyaga ega
Majmuaga mustaqil rezerv akkumulyator bilan jihozlangan ovozli signalizatsiya ham kiradi.
Agar avtomobilning asosiy elektr ta’minoti uzib qo‘yilsa ham, signalizatsiya ishlashda davom etishi mumkin. Shu sababli avtomobilga ruxsatsiz kirishga urinish vaqtida asosiy batareyani uzib qo‘yish tizimni to‘liq o‘chirib qo‘ymaydi.
Bu qo‘shimcha himoya ayniqsa elektron usullar orqali avtomobilni o‘g‘irlashga qarshi kurashda muhim hisoblanadi.
Tizimni o‘rnatish besh soat davom etadi
Toyota ma’lumotiga ko‘ra, yangi immobilayzerni avtomobilga o‘rnatish taxminan besh soat vaqt oladi.
O‘rnatish jarayonida rul kolonkasiga qo‘shimcha qizil indikator joylashtiriladi. Shuningdek, avtomobil oynasiga o‘g‘irlikka qarshi qo‘shimcha tizim o‘rnatilgani haqida ogohlantiruvchi stiker yopishtiriladi.
Bunday belgi potensial o‘g‘rilarga avtomobilda qo‘shimcha himoya borligini oldindan ko‘rsatishi ham mumkin.
Kafolat ham beriladi
Qo‘shimcha himoya tizimiga kafolat taqdim etiladi. Agar avtomobilning zavod kafolati hali amal qilayotgan bo‘lsa, tizim qolgan shu muddat davomida kafolatlanadi.
Alohida holda esa immobilayzerga o‘rnatilgan kundan boshlab ikki yillik kafolat beriladi. Toyota mijoz uchun qaysi variant uzoqroq amal qilsa, o‘sha muddatni qo‘llaydi.
Avval mexanik blokator ham taklif qilingan
Toyota Australia avval Land Cruiser egalari uchun rul kolonkasiga o‘rnatiladigan mexanik blokatorni ham taklif qilgan edi.
Biroq mustaqil sinovlar bunday qurilmani elektr asboblari yordamida nisbatan qisqa vaqt ichida buzish mumkinligini ko‘rsatgan. Shu sababli yangi elektron immobilayzer avvalgi mexanik yechimga qaraganda kuchliroq himoya sifatida taqdim etilmoqda.
Avvalroq «Kursiv» Toyota bZ3X 520 km yuradigan versiyada sotuvga chiqqani haqida yozgan edi.
