Anorbank aksiyador bilan bog‘liq shov-shuvli xabarlarga munosabat bildirdi
Anorbank o‘zining aksiyadorlaridan biri va kuzatuv kengashi a’zosi Kaxramonjon Olimov xalqaro qidiruvga berilgani haqidagi xabarlar ortidan bayonot e’lon qildi. Bank aksiyadorga oid vaziyat muassasa boshqaruvi, kapitali va operatsion faoliyatiga aloqador emasligini ta’kidlagan.
Shaxsiy masala va bank faoliyati
Anorbank bayonotiga ko‘ra, ijtimoiy tarmoqlarda tarqalayotgan ma’lumotlar aksiyadorlardan birining shaxsiy ishi hisoblanadi. Shuningdek, ushbu masalalarni bank faoliyati bilan aralashtirish noto‘g‘ri va yo‘l qo‘yib bo‘lmaydigan holatdir.
Rasmiy so‘rovlarning yo‘qligi
Moliya muassasasi mazkur masala yuzasidan vakolatli organlardan hech qanday rasmiy so‘rov yoki tasdiq kelib tushmaganini ma’lum qildi. Internetda tarqalayotgan xabarlar esa tasdiqlanmagan dalillarga asoslangani aytilmoqda.
Mijozlarga xizmat ko‘rsatish
Hozirgi vaqtda bank barcha moliyaviy operatsiyalar, mijozlarga xizmat ko‘rsatish hamda hamkorlar oldidagi majburiyatlarni odatdagi tartibda bajarmoqda. Shuningdek, tashkilot jamoatchilikni anonim manbalar tomonidan tarqatilayotgan materiallarga tanqidiy yondashishga va faqat rasmiy tasdiqlangan ma’lumotlarga ishonishga chaqirgan.
Aksiyadorlar ro‘yxati va ustav fondi
Rasmiy ma’lumotlarga ko‘ra, muassasaning ustav fondi 850 mlrd so‘mni tashkil etadi. Bank ta’sischilari va ularning ustav fondidagi ulushi quyidagicha taqsimlangan: «Bekamin B.V.» kompaniyasi – 50 foiz, Kaxramonjon Olimov – 49,40 foiz va «Kapital Sug‘urta» AJ – 0,60 foiz.
Avvalroq Kursiv nashri Anorbank aksiyadori Kaxramonjon Olimovga nisbatan xalqaro qidiruv e’lon qilingani haqida xabar bergan edi.
