Namangan va Farg‘onada firibgarlik holatlari aniqlandi

Namangan va Farg‘ona viloyatlarida fuqarolarni xorijga ishga yuborish hamda Umra ziyoratini tashkil etishni va’da qilib pul olgan shaxslar ushlandi.

Xorvatiyaga ishga yuborishni va’da qilgan

Namangan shahrida yashovchi 2004-yilda tug‘ilgan shaxs To‘raqo‘rg‘on tumanida istiqomat qiluvchi ikki fuqaroning ishonchiga kirgan.

U tanishlari orqali ularni Xorvatiyaga ishga yuborishni va’da qilib, buning evaziga $3,6 ming talab qilgan.

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari o‘tkazgan tezkor tadbir davomida gumonlanuvchi oldindan $1 ming olayotgan vaqtida ashyoviy dalillar bilan ushlangan.

Umra ziyorati uchun $2,2 ming olgan

Farg‘ona viloyatida esa Buvayda tumanida yashovchi, 1969-yilda tug‘ilgan shaxs Umra ziyoratini tashkil etish vakolatiga ega bo‘lmagan holda ikki fuqaroni Saudiya Arabistoniga yuborishni va’da qilgan.

U buning evaziga $2,2 ming olayotgan vaqtida DXX va ichki ishlar organlari xodimlari tomonidan ushlangan.

Jinoyat ishlari qo‘zg‘atildi

Hozirda har ikki holat bo‘yicha Jinoyat kodeksining 168-moddasi bilan jinoyat ishlari qo‘zg‘atilib, tergov harakatlari olib borilmoqda.

Avvalroq «Kursiv» Farg‘onada 144 mln so‘mlik kuchli ta’sir qiluvchi dori vositasi aniqlangani haqida yozgan edi.