General Motors ayrim Chevrolet Equinox EV elektromobillarida orqa tormoz kolodkalaridan shovqin chiqishi bilan bog‘liq holatni o‘rganmoqda. Muammo, asosan, avtomobil orqaga harakatlanayotganda kuzatilishi mumkin.
GM Authority ma’lumotiga ko‘ra, shovqin ko‘proq avtomobilning orqa qismidan, orqaga yurish vaqtida eshitilishi mumkin.
Sovuq havo yoki yuqori namlik bunday tovushning paydo bo‘lish ehtimolini oshirishi mumkin. Hozircha muammoning aniq sababi aniqlanmagan.
Bu chaqirib olish kampaniyasi emas
GM’ning ta’kidlashicha, mazkur holat avtomobilni ishlatishni to‘xtatishni talab qilmaydi va haydovchilar Equinox EV’dan foydalanishda davom etishi mumkin. Kompaniya bu holatni chaqirib olish kampaniyasi sifatida baholamayapti.
Muhandislar sababni aniqlagach, servis byulleteni yangilanishi yoki yangi texnik ko‘rsatma chiqarilishi mumkin.
Muammo Cadillac Optiq’da ham uchrashi mumkin
Xuddi shunday holat ayrim Cadillac Optiq elektromobillarida ham kuzatilishi mumkinligi aytilmoqda.
Chevrolet Equinox EV AQSh bozorida $35 mingdan past boshlang‘ich narxda taklif qilinadigan elektromobillardan biri hisoblanadi. Ayrim versiyalarda uning yurish zaxirasi 319 milyagacha yetadi. Model old yoki to‘liq g‘ildirakdan tortish tizimi bilan taklif etiladi.
Eslatib o‘tamiz, avvalroq Chevrolet yangi sedanini uch xil dvigatel bilan chiqarishi mumkinligi haqida xabar berilgandi. Yangi sedan Xitoydagi SAIC-GM-Wuling qo‘shma korxonasi tomonidan ishlab chiqilmoqda. Avtomobilning moslashuvchan platformasi turli bozorlar talabiga qarab bir nechta kuch qurilmalaridan foydalanish imkonini berishi aytilmoqda.
