Shaxmat Olimpiadasi, Mirziyoyevaning BMT minbaridagi nutqi — haftaning muhim yangiliklari
Shaxmat Olimpiadasi, Mirziyoyevaning BMT minbaridagi nutqi — haftaning muhim yangiliklari Kursiv Uzbekistan dayjestida.
O‘zbekiston Samarqanddagi shaxmat Olimpiadasida chempion bo‘ldi
O‘zbekiston erkaklar terma jamoasi Samarqandda o‘tgan 46-Butunjahon shaxmat Olimpiadasida oltin medalni qo‘lga kiritdi. Bu milliy jamoaning Olimpiadalar tarixidagi ikkinchi chempionligi bo‘ldi.
O‘zbekiston hal qiluvchi 11-turda Ukraina terma jamoasiga qarshi bahs olib bordi. Musobaqa yakunida mezbonlar umumiy hisobda birinchi o‘rinni egalladi.
Qozog‘iston mudofaa vaziri Dauren Kosanov lavozimidan ozod etildi
Qozog‘iston prezidenti Qasim-Jomart Toqayev mudofaa vaziri Dauren Kosanovni lavozimidan ozod etdi. Tegishli farmon 27-sentabr kuni e’lon qilindi.
Kosanovning lavozimdan ketishi Kaspiy dengizida o‘tkazilgan harbiy mashg‘ulotlar vaqtida harbiy xizmatchilar halok bo‘lgan fojia ortidan yuz berdi.
Bunday jinoyatlar uchun o‘lim jazosini qo‘llash kerak — Saida Mirziyoyeva Namangandagi 5 yoshli qiz bilan bog‘liq holatga munosabat bildirdi
Prezident administratsiyasi rahbari Saida Mirziyoyeva Namanganda 5 yoshli qizga nisbatan jinsiy zo‘ravonlik sodir etilgani haqidagi holatga munosabat bildirdi. U bunday jinoyatlar uchun javobgarlikni maksimal darajada kuchaytirish bo‘yicha taklif tayyorlanayotganini ma’lum qildi.
Nazarimda, bunday vahshiyona jinoyatlar uchun o‘lim jazosini qo‘llash kerak. Amaldagi qonunchilikda oliy jazo ko‘zda tutilmagan, shu bois javobgarlikni maksimal darajada kuchaytirish uchun qonun hujjatlariga o‘zgartirish kiritish bo‘yicha taklif tayyorlayapmiz, – deya yozdi u.
Shavkat Mirziyoyev Qozog‘istondagi harbiylar halokati munosabati bilan hamdardlik bildirdi
O‘zbekiston prezidenti Shavkat Mirziyoyev Qozog‘istonning Mang‘istau viloyatida harbiy mashg‘ulotlar vaqtida 14 nafar harbiy xizmatchi halok bo‘lgani munosabati bilan hamdardlik bildirdi. Bu haqda Aqorda xabar berdi.
Prezident Qozog‘iston rahbari Qasim-Jomart Toqayev, halok bo‘lganlarning oila a’zolari va yaqinlariga, shuningdek, Qozog‘iston xalqiga chuqur ta’ziya izhor qilgan. Qozog‘iston prezidenti voqeadan so‘ng qurbonlarning yaqinlariga hamdardlik bildirgan va mamlakatda 25-sentabrni umummilliy motam kuni deb e’lon qilgan.
Abduqodir Husanov «Chelsi»ga o‘tadimi — tafsilotlar
O‘zbekiston terma jamoasi va «Manchester Siti» himoyachisi Abduqodir Husanovning ehtimoliy «Chelsi»ga transferi Toshkentning «Bunyodkor» klubiga sezilarli moliyaviy tushum keltirishi mumkin. Bu haqda Sports.kz xabar berdi.
Husanov 7-8 yoshidan «Bunyodkor» akademiyasida tarbiya topgan va 2022-yilda Minskning «Energetik-BGU» klubiga o‘tguniga qadar klub tizimida bo‘lgan.
Taftish.uz rahbari 10,6 yilga, jurnalisti 4,1 yilga ozodlikdan mahrum qilindi
O‘zbekiston Harbiy sudi Taftish.uz tahririyati xodimlari va DXXning sobiq xodimlariga nisbatan hukm chiqardi. Huquq himoyachisi, «Ezgulik» inson huquqlari jamiyati raisi Abdurahmon Tashanov ma’lumotiga ko‘ra, sudlanuvchilarga 4,1 yildan 10,6 yilgacha ozodlikdan mahrum qilish jazosi tayinlangan.
Taftish.uz rahbari G‘ayrat Aberayev 10 yil 6 oyga, jurnalist Marjona Eshquvatova esa 4 yil 1 oyga ozodlikdan mahrum qilingan.
Tashanovning bildirishicha, tahririyatning yana ikki vakili hamda DXXning sobiq xodimlariga 10 yildan ortiq muddatga ozodlikdan mahrum qilish jazolari tayinlangan. Sud majlisi yopiq tartibda o‘tkazilgan. E’lon qilingan ma’lumotlarda ish tuhmat, haqorat, firibgarlik va tovlamachilik bilan bog‘liq ayblovlarni qamrab olgani aytiladi. Hukmga ko‘ra, mahkumlar jazoni umumiy tartibdagi koloniyalarda o‘taydi.
Saida Mirziyoyeva JST rahbari bilan O‘zbekistonning a’zolik jarayonini muhokama qildi
Prezident Administratsiyasi rahbari Saida Mirziyoyeva Jahon savdo tashkiloti bosh direktori Ngozi Okonjo-Iveala bilan uchrashdi. Muloqot davomida O‘zbekistonning JSTga a’zo bo‘lish jarayonidagi hozirgi holat va yakunlanishi kerak bo‘lgan vazifalar muhokama qilingan.
O‘zbekiston avvalroq JSTga a’zolik jarayonini 2026-yilda yakunlash rejasini tasdiqlagan. Iyul oyida tashkilotga qo‘shilish bo‘yicha Ishchi guruhning 13-yig‘ilishida ham shu maqsad qayd etilgan.
Shavkat Mirziyoyev va Irakliy Kobaxidze transport hamkorligini muhokama qildi
O‘zbekiston prezidenti Shavkat Mirziyoyev Gruziya bosh vaziri Irakliy Kobaxidze bilan telefon orqali muloqot qildi. Suhbat avvalida davlat rahbari Kobaxidzeni tavallud kuni bilan tabriklab, unga mustahkam sog‘liq, Gruziya xalqiga esa farovonlik va ravnaq tiladi.
Muloqot davomida O‘zbekiston va Gruziya o‘rtasidagi strategik sheriklik munosabatlarini yanada kengaytirish masalalari ko‘rib chiqildi.
Asosiy e’tibor Shavkat Mirziyoyevning 2 – 3-iyul kunlari Gruziyaga davlat tashrifi yakunida erishilgan kelishuvlarni amalga oshirishga qaratildi.
Timur Turlov FIDE prezidenti etib saylandi
Timur Turlov Xalqaro shaxmat federatsiyasi (FIDE) prezidenti etib saylandi. Saylovlar 26-sentabr kuni Samarqandda 46-Butunjahon shaxmat olimpiadasi bilan parallel ravishda o‘tkazilayotgan tashkilot Bosh assambleyasi doirasida bo‘lib o‘tdi. Saylovda uchta prezidentlik tandemi ishtirok etdi.
FIDE prezidenti lavozimiga Timur Turlov, Yan Xenrik Byuttner va Vadim Rozenshteyn da’vogarlik qilgan. Ularning har biri vitse-prezident lavozimiga nomzod Vishvanatan Anand, Malkolm Peyn va Gordon Tang bilan juftlikda ko‘rsatilgan.
Namangandagi bog‘chada 5 yoshli qizga jinsiy zo‘ravonlik: ayrim xodimlar ishdan olindi
Namangan viloyatining Uchqo‘rg‘on tumanidagi davlat bog‘chasida voyaga yetmagan tarbiyalanuvchiga nisbatan jinsiy zo‘ravonlik holati yuzasidan jinoyat ishi qo‘zg‘atildi. Gumonlanuvchi protsessual tartibda ushlanib, unga nisbatan qamoq ehtiyot chorasi qo‘llanildi.
Holat yuzasidan Ichki ishlar vazirligi, Bolalar ombudsmani hamda Namangan viloyati Maktabgacha va maktab ta’limi boshqarmasi rasmiy ma’lumot berdi.
Saida Mirziyoyeva BMT minbarida nimalar haqida gapirdi
Prezident Administratsiyasi rahbari Saida Mirziyoyeva BMT Bosh Assambleyasining 81-sessiyasi doirasida so‘zga chiqib, O‘zbekistonning xalqaro maydondagi ustuvor yondashuvlari haqida gapirdi.
BMT Bosh Assambleyasining 81-sessiyasi umumiy munozaralari 22-sentabr kuni Nyu-Yorkda boshlandi. Sessiyaning yuqori darajadagi haftaligi 18 – 28-sentabr kunlari o‘tkazilmoqda.
Saida Mirziyoyeva o‘z Telegram kanalida dunyoda ziddiyatlar kuchayib, o‘zaro ishonch kamayib borayotgan bir paytda O‘zbekiston ochiqlik, yaxshi qo‘shnichilik va muloqot tamoyillariga sodiq qolishini ta’kidladi.
Siyosatdan yiroq odam, yuragidagi bor gapni gapirdi — Mirziyoyev (video)
Prezident Shavkat Mirziyoyev Andijonga tashrifi davomida oqsoqollardan birining «Notinch dunyoda tinch mamlakat bor – bu O‘zbekiston» degan gapini alohida ta’kidladi.
Davlat rahbari Andijonda kechasi kam uxlaganini aytib, viloyatdagi masalalar ko‘pligi haqida gapirdi.
Pokiston Afg‘onistonga yana zarba berdi. Qurbonlar bor
Pokiston 23-sentabr kuni Afg‘onistondan uchirilgan dronlar hujumiga javoban qo‘shni davlat hududidagi 10 ta obyektga havo va dron zarbalari berganini ma’lum qildi. Afg‘oniston tomoni esa zarbalar oqibatida tinch aholi orasida qurbonlar borligini bildirdi.
Milliy statistika qo‘mitasi talabalar uchun stipendiya tanlovini e’lon qildi
Milliy statistika qo‘mitasi iqtidorli talabalarni aniqlash, ularni rag‘batlantirish va qo‘mita uchun istiqbolli kadrlar zaxirasini shakllantirish maqsadida stipendiya tanlovini e’lon qildi.
Tanlovda O‘zbekistondagi oliy ta’lim muassasalarida kunduzgi ta’lim shaklida tahsil olayotgan talabalar ishtirok etishi mumkin.
Ramzan Qodirov Checheniston rahbari saylovida g‘alaba qozondi
Chechenistonning amaldagi rahbari Ramzan Qodirov hudud rahbari saylovida 99,85 foiz ovoz oldi. Bu haqda Rossiya Markaziy saylov komissiyasi ma’lumotlariga tayanib Interfax xabar berdi. Barcha byulletenlar hisoblab chiqilgan.
